ნინოწმინდაში სახელმწიფო ქონების მოტყუებით დაუფლების ბრალდებით მოქალაქე დააკავეს
10:14 / 19.06.2018
საქართველოს ფინანსთა სამინისტროს საგამოძიებო სამსახურმა, მართლსაწინააღმდეგო მისაკუთრების მიზნით, დიდი ოდენობით ქონების მოტყუებით
დაუფლების ორი ფაქტი გამოავლინა და ორი პირი პასუხისგებაში მისცა.
გამოძიებით დადგინდა, რომ ერთ შემთხვევაში, ბრალდებული, ყალბი დოკუმენტების გამოყენებით, მოტყუებით დაეუფლა ნინოწმინდის მუნიციპალიტეტში მდებარე, სახელმწიფოს კუთვნილებაში არსებულ 558 მ2 მიწის ნაკვეთს, რომლის ღირებულება 33 862 ლარს შეადგენს.
ამ ეტაპზე, მოტყუებით დაუფლებული მიწის ნაკვეთები დაყადაღებულია.
მეორე შემთხვევაში ბრალდებული, ასევე ყალბი ნოტარიული მინდობილობის გამოყენებით, მოტყუებით დაეუფლა ქალაქ თბილისში მდებარე, კერძო პირის საკუთრებაში არსებულ 469 000 ლარის ღირებულების მიწის სამ ნაკვეთს.
ასევე, ტარდება შესაბამისი ოპერატიულ-სამძებრო ღონისძიებები აღნიშნულ დანაშაულში მონაწილე სხვა პირების დადგენა-მხილების მიზნით.
გამოძიება მიმდინარეობს საქართველოს სისხლის სამართლის კოდექსის 180-ე მუხლის მე-3 ნაწილით და 362-ე მუხლის პირველი ნაწილით, რაც სასჯელის სახით ითვალისწინებს თავისუფლების აღკვეთას ვადით 6-დან 9 წლამდე.