ასპინძაში, სოფელ ძველის ტერიტორიაზე მტკვარ - არაქსის დროინდელი ნივთები აღმოჩნდა. არქეოლოგიური გათხრები ეროვნული მუზეუმის წარმომადგენლებმა აწარმოეს.

სოფლის ტერიტორიაზე ადრე, შუა და გვიან ბრინჯაოს ხანის – მტკვარ –არაქსის კულტურა აღმოჩნდა. აღმოჩენა უნიკალურია იმით, რომ ასპინძის ტერიტორიაზე ამ დრომდე არ იყო ადრე ბრინჯაოს ხანის ნივთები.

,,ჩემი ინფორმაციით, არქეოლოგიური სამუშაოები უნდა გაგრძელდეს. კერამიკის ჭურჭელი და ხელსაფქვავი ყორღანის გათხრის შედეგად იპოვეს, მნიშვნელოვანი დეტალებია აღმოჩენილი. საკულტო კერამიკის ნივთია, ყორღანის გახსნიდან ახლოს, მსგავსი ნივთები ახალციხეში, ძველი რაბათის ტერიტორიაზეც აღმოჩნდა“ – აცხადებს ასპინძის მუნიციპალიტეტის მერიის კულტურის სამსახურის მთავარი სპეციალისტი ძეგლთა დაცვის საკითხებში.

კახა ზედგინიძე ამბობს, რომ ზაფხულში ჩატარებული გათხრები წელსაც განახლდება. რაც შეეხება აღმოჩენილ ნივთებს, ისინი ახალციხის მუზეუმშია გადატანილი. 

სოფელი ძველი არქეოლოგიური თვალსაზრისით მნიშვნელოვანი ადგილია. აქ პირველი გათხრები 1974 წელს, არქეოლოგ ტარიელ ჩუბინშვილის ხელმძღვანელობით ჩატარდა, მაშინ აქ მტკვარ–არაქსის კულტურის, მესამე ათასწლეულის პერიოდის ნამოსახლარი აღმოაჩინეს. ამავე პერიოდშია ნაპოვნი თიხის სადგარი ოფსიდიანის თვალებით, რომელიც ახლა სამცხე–ჯავახეთის ისტორიის მუზეუმს ეკუთვნის.