ახალციხის საკრებულომ 2017 წლის ბიუჯეტი დაამტკიცა. მომავალი წლის მთავარი ფინანსური დოკუმენტი 7 774 000 ლარით განისაზღვრა.

საკრებულოში განმარტავენ, რომ ამ თანხაში ასახული არ არის თავისუფალი ნაშთი, რომელიც 2016 წელს სრულად ვერ გაიხარჯა. ამ დროისათვის ნაშთი,  დაახლოებით 390 000 ლარს შეადგენს, ბიუჯეტში ასევე არ არის ასახული  ფონდებიდან გადმოსარიცხი თანხები.

მთავარი ფინანსური დოკუმენტის მიხედვით, სუბსიდია შეუმცირდა არასამეწარმეო არაკომერციულ იურიდიულ პირებს. მათ შორისაა ახალციხის ციხე, რომელსაც დაფინანსება გაუნახევრდა. საკრებულოს თავმჯდომარის განმარტებით, თანხები ისეთ ა(ა)იპ ებს შეუმცირდა, რომელთა შემოსავლებიც გაზრდილია.

ქალაქ ახალციხის 2017 წლის ბიუჯეტი საკრებულოს სხდომაზე ხმათა უმრავლესობით დამტკიცდა. მთავარ ფინანსური დოკუმენტს მხარი არ დაუჭირა ოპოზიციური პარტიების ოთხმა წარმომადგენელმა. „ფრაქცია – ნაციონალური მოძრაობის“ თავმჯდომარემ ა(ა)იპ–ებში დასაქმებულთა რაოდენობა და მათი საქმიანობა გააპროტესტა.

2017 წლის ბიუჯეტის მიხედვით, შემცირებულია ადმინისტრაციული ხარჯები დაახლოებით, 140 000 ლარით ახალციხის მერიაში  და 173 000 ლარით –  საკრებულოში.   თანხები ძირითადად პრემიისა და დანამატების ხარჯზე შემცირდა.

ავტორები: თიკო კურტანიძე, ნანა ინასარიძე.