Վրաստանի ընդդիմության կողմից կազմակերպված բողոքի ակցիան ուշ գիշերին ավարտվեց Վրաստանի Կենտրոնական ընտրական հանձնաժողովի գլխավոր գրասենյակի դիմաց, որտեղ մի քանի անգամ հատուկ միջոցներ կիրառվեցին ցուցարարների դեմ:

ԿԸՀ-ի շենքի դիմաց ժամեր շարունակ կուտակված էին մեծ թվով հատուկ ջոկատայիններ և ջրցան մեքենաներ: Մի քանի անգամ իրավիճակի սրման պատճառով իրավապահները ջրցան մեքենա կիրառելով ցրեցին ցույցը:

Ուշ գիշերին «Ազգային շարժման» առաջնորդներից Նիկա Մելիան և «Քաղաքացիներ» կուսակցության առաջնորդ Ալեկո Էլիսաշվիլին ցուցարարներին կոչ արեցին հեռանալ ԿԸՀ-ի տարածքից և պատրաստվել այսօր՝ նոյեմբերի 9-ին, ժամը 18:00-ին նորից հավաքվելու Ռուսթավելիի պողոտայում:

Իրավապահների և ցուցարարների միջև բախումների հետևանքով մի քանի անձ է վիրավորվել: Վիրավորների մեջ մեծամասամբ լրագրողներ և օպերատորներ են:

Հիշեցնենք՝ նոյեմբերի 8-ին Վրաստանի ընդդիմադիր 7 կուսակցություն մեծամասշտաբ բողոքի ակցիա անցկացրեց Թբիլիսիում գտնվող խորհրդարանի շենքի դիմաց:

Ընդդիմության պահանջներն են.

• Նոր, արդար և ազատ խորհրդարանական ընտրությունների անցկացում,
• ԿԸՀ-ի նախագահի հրաժարական և նոր ընտրական հանձնաժողովի ձևավորում,
• Բոլոր քաղբանտարկյալների ազատ արձակում:

Պահանջները կատարելու և անձամբ Իվանիշվիլիի հետ հանդիպելու համար ընդդիմությունը իշխանությանը մինչև ժամը 20:00-ն ժամանակ էր տվել, սակայն էական արձագանք չստանալով, որոշում կայացվեց տեղափոխվել ԿԸՀ-ի կենտրոնական գրասենյակ և արգելափակել շենքը:

Հոկտեմբերի 31-ին Վրաստանում կայացան խորհրդարանական ընտրություններ, որոնց արդյունքում պետք է ձևավորվի 10-րդ գոմարման խորհրդարանը: 1 տոկոսանոց շեմը հաղթահարած 9 կուսակցություններից 8-ը հրաժարվել են իրենց մանդատներից ու չեն ճանաչում ընտրության արդյունքները: Նրանք ընտրությունների հաջորդ օրվանից սկսած մշտական բողոքի ցույցեր են անցկացնում: