ადიგენის ოლქში, ცესკოს მიერ დანიშნული წევრი, "ოცნების" კანდიდატის ნათესავია - "ნაციონალები"
18:34 / 07.09.2020
საქართველოს ცენტრალურმა საარჩევნო კომისიამ ადიგენის საოლქო საარჩევნო კომისიის წევრად „ოცნების“ მაჟორიტარი დეპუტატობის კანდიდატის ბიძაშვილი დანიშნა. ადგილობრივი ოპოზიცია ამბობს, რომ ქეთევან ობოლაშვილი ნეიტრალური ვერ იქნება და ის ცესკომ სხვა პირით უნდა ჩაანაცვლოს.
ქეთევან ობოლაშვილი ცესკომ ადიგენის საოლქო საარჩევნო კომისიის მეექვსე, დამოუკიდებელ, დროებით წევრად ოთხ სექტემბერს, კონკურსის წესით შეარჩია. მან ცესკოს 13 წევრის ხმათა უმრავლესობა მიიღო. „ნაციონალურ მოძრაობაში“ ამ ფაქტს არაობიექტური უწოდეს. ახალციხის შტაბში ბრიფინგზე განაცხადეს, რომ მმართველი პარტიის კანდიდატის ბიძაშვილი ნეიტრალური ვერ იქნება.
ცესკოში ამბობენ, რომ ქეთევან ობოლაშვილის დანიშვნა კანონის სრული დაცვით მოხდა და მის ჩანაცვლებას არ აპირებენ.
„შერჩევის პროცესს აკვირდებოდნენ სამოქალაქო ორგანიზაციების დამკვირვებლები და პოლიტიკური პარტიების წარმომადგენლები. თითოეული კომისიის წევრი არჩეულია კანონმდებლობის სრული დაცვით“, - განაცხადა „მეცხრე არხთან“ ცესკოს პრეს-სპიკერმა ანა მიქელაძემ.
როგორ აპირებს ობიექტურობის შენარჩუნებას, როცა მისი ბიძაშვილი მმართველი პარტიის კანდიდატია - ამ კითხვით ქეთევან ობოლაშვილს მივმართეთ.
„ჯერ უნდა მკითხოთ, მაქვს თუ არა დრო და სურვილი რომ გაგესაუბროთ. ვთიშავ ტელეფონს, დაკავებული ვარ“, - გვითხრა ქეთევან ობოლაშვილმა და კომენტარზე უარი განაცხადა.
ადიგენის ოლქის თავმჯდომარე ჯაბა მაჭარაშვილი ამბობს, რომ ის ბოლო წლებია მუდმივად კომისიის შემადგენლობაშია. მას, როგორც გამოცდილ კადრს, ცესკო უპირატესობას ანიჭებს.
"დაახლოებით, სამი-ოთხი არჩევნებია, რაც ცესკოდან კომისიის წევრად მოდის ჩვენთან. სკოლის დირექტორი კი არის, მაგრამ უფასო შვებულებაში გადის”, - გვითხრა ჯაბა მაჭარაშვილმა.
"საქართველოს ახალგაზრდა იურისტთა ასოციაციაში" ამბობენ, რომ ქეთევან ობოლაშვილს აღნიშნული პოზიციის დაკავება შეუძლია და ამით კანონს არ არღვევს.