“ქართული ოცნების” აგიტატორები #27–ე წყრუთის საარჩევნო უბნის ეზოში ამომრჩევლის აღრიცხვას აწარმოებენ. ერთ–ერთი აგიტატორის თქმით, ჩამოწერილი სია მას თავად ,,ქართული ოცნების” შტაბის ხელმძღვანელმა გიორგი გვარამაძემ გადასცა.

საუბნო კომისიაში ხმის მისაცემად მისული ამომრჩეველი მითითებას ჯერ ეზოში მყოფი აგიტატორებისგან იღებს და მხოლოდ ამის შემდეგ შედის საარჩევნო უბნის შენობაში.

კომისიის მდივანი აგავნი ანანიანი ამბობს, რომ ამის გამო ,,ქართული ოცნების” აგიტატორებს შენიშვნა რამდენჯერმე მისცა, თუმცა მათ ეზო ცოტა ხნით, მხოლოდ მას შემდეგ დატოვეს, როცა საარჩევნო უბანთან ,,მეცხრე არხის”  გადამღები ჯგუფი გამოჩნდა. ,,ექო”–ს კითხვაზე, იყო თუ არა საუბნო საარჩევნო კომისიის ეზოში ყოფნა კანონდარღვევა და ვისი მითითების საფუძველზე აწარმოებენ აღრიცხვას აგიტატორები – ხმაური მოყვა. მათი განმარტებით, ეზოში ყოფნა და ამომრჩევლის აღრიცხვა კანონდარღვევა არ არის, აღნიშნული დავალება მათ, შტაბის ხელმძღვანელის გიორგი გვარამაძისგან მიიღეს. “მეცხრე არხის”გადამღები ჯგუფი წყრუთის #27–ე საარჩევნო უბანთან რჩება.

“ქართული ოცნების” ახალციხის შტაბის უფროსი “მეცხრე არხთან” განმარტავს, რომ აგიტატორებს, ამომრჩევლების აღრიცხვის უფლება აქვთ. თუმცა გიორგი გვარამაძე, მის მიერ სიების გადაცემას კატეგორიულად უარყოფს.

“უბნის გარეთ ნებისმიერს აქვს უფლება, რომ ჰკითხოს ვის მიეცით ხმაო, მაგრამ ეს არის ამომრჩევლის უფლება, გასცემს თუ არა პასუხს ამასთან დაკავშირებით. წინასწარ ვის რა სიები აქვს გადაცემული არვიცი, ეს სიმართლეს არ შეესაბამება. ამომრჩეველთა სიები უბანზე თვალსაჩინოდ არის გამოკრული, იქიდან ამოიწერენ და აკეთებენ აღრიცხვას” –განაცხადა გიორგი გვარამაძემ.

კითხვაზე, რატომ ვერ შედის ამომრჩეველი “ქართული ოცნების” აგიტატირებთან გასაუბრების გარეშე უბანზე, გიორგი გვარამაძემ გვიპასუხა, რომ არ იცის და არც აინტერესებს.

რუსუდან გვარამაძე ,მაია იველაშვილი