22 ხმით 7–ის წინააღმდეგ, ახალციხეში თვითმმართველი თემის საკრებულოს თავმჯდომარედ დავით ლომიძე აირჩა.  ,,ქართული ოცნების“ წარმომადგენელი საკრებულოს თავმჯდომარედ ფარული კენჭისყრის საფუძველზე დასახელდა.  პროცესს ახლადარჩეული სამანდატო კომისიის ხელმძღვანელი, თამარ გოგინაშვილი უძღვებოდა. დღესვე აირჩა საკრებულოს თავმჯდომარის მოადგილე, აღნიშნულ თანამდებობაზე გელა ნოზაძე იქნება. რაც შეეხება თვითმამრთველ ქალაქს, აქ საკრებულოს პირველი სხდომა, დღეს  15:00 საათზე გაიმართება.

ახალციხის ადმინისტრაციულ შენობაში ახლადარჩეული  საკრებულოს პირველი სხდომა მიმდინარეობს. ამ წუთებში, #37–ე ახალციხის საოლქო საარჩევნო კომისიის თავმჯდომარე, თეა გავაშელი 15 ივნისის ადგილობრივი თვითმმართველობის არჩევნების შემაჯამებელ ოქმს კითხულობს. რომლის შემდეგაც, როგორც თვითმმართველი თემის, ასევე თვითმმართველი ქალაქის საკრებულოს შემადგენლობა დაკომპლექტდება, კენჭისყრის შედეგად კი მისი თავმჯდომარეები და  მოადგილეები დასახელდებიან. სხდომას, ახალციხის მუნიციპალიტეტის საკრებულოს ყოფილი თავმჯდომარე, ოლეგ სანდროშვილი არ ესწრება. შეგახსენებთ, რომ თვითმმართველი თემის საკრებულო 30 დეპუტატით დაკომპლექტდება, მასში ,,ქართული ოცნებისა“ და ,,ერთიანი ნაციონალური მოძრაობის“ წარმომადგენლები შევლენ. რაც შეეხება თვითმმართველი ქალაქის საკრებულოს, აქ 15 დეპუტატი იქნება, ,,ქართული ოცნების“, ,,ერთიანი ნაციონალური მოძრაობისა“ და ,,ერთიანი ოპოზიციის“  წევრები.

თვითმართველობის არჩევნების შემდეგ ახალციხეში პოლიტიკური პარტიების უმრავლესობამ ფუნქციონირება შეწყვიტა და საარჩვენო შტაბები დახურა. საოლქოში დარეგისტრირებული ცხრა პოლიტიკური პარტიიდან ამ დროისათვის მხოლოდ ორი მათგანის, „ქართული ოცნებისა“ და „ნაციონალური მოძრაობის“ ოფისები მუშაობენ. სხვა პარტიების  წარმომადგენლები კი  ამბობენ, რომ პოლიტიკური საქმიანობას დედაქალაქში აგრძელებენ.

საკრებულოს პირველი სხდომები ახალციხის, ადიგენისა და ასპინძის მუნიციპალიტეტებში 14 ივლისს გაიმართება. ამის შესახებ გადაწყვეტილება ცენტრალური საარჩევნო კომისიის თავმჯდომარემ თამარ ჟვანიამ გუშინ გამართულ სხდომაზე მიიღო. #37–ე ახალციხის საოლქო საარჩევნო კომისიის თავმჯდომარის განმარტებით, ახალციხეში სხდომა 10:00 საათზე დაიწყება, რა დროსაც თვითმმართველი თემის საკრებულოს  წევრები ოფიციალურად დასახელდებიან.

ასპინძის მუნიციპალიტეტის საკრებულო 27 დეპუტატით დაკომპლექტდა.  თვითმმართველობის არჩევნების შედეგად, ადგილობრივ საკანონმდებლო ორგანოში დამოუკიდებლად დარეგისტრირებული და 4 პოლიტიკური პარტიის კანდიდატები შევლენ. 15 პროპორციულ და 12 მაჟორიტარულ წესით არჩეულ წევრებს შორის ქალი დეპუტატები არ არიან.

ახალქალაქში ხელახალი კენჭისყრის შედეგად კვლავ ,,ქართული ოცნების” საარჩევნო კანდიდატი ლიდერობს. არჩევნების განმეორებითი პროცესი აქ #1-ელ უბანზე ბლოკ ,,არასაპარლამენრო ოპოზიციისა” და ,,მრავალეროვანი საქართველოს” სარჩელის საფუძველზე გაიმართა.

ახალქალაქის #1-ელ საარჩევნო უბანზე, განმეორებითი  კენჭისყრის პირველადი შედეგების მიხედვით, უპირატესობა კვლავ ,,ქართული ოცნების” მაჟორიტარმა დეპუტატმა მოიპოვა. ნაირ ირისიანმა ამომრჩეველთა  371 ხმა მიიღო. რაც შეეხება ,,არასაპარლამენტო ოპოზიციის” საარჩევნო სუბიექტს, გრიგოლ წუწუმიამ 241 ხმა დააგროვა. #40-ე ახალქალაქის საარჩევნო ოლქში, #1-ე უბანზე სულ 1521 ამომრჩეველი იყო რეგისტრირებული. მათგან დღეს საკუთარი პოზიცია 682-მა დააფიქსირა. იმავე უბანზე, 15 ივნისის ადგილობრივი თვითმმართველობის არჩევნებში მონაწილეობა 525-მა ამომრჩეველმა მიიღო. განმეორებითი კენჭისყრის საბოლოო შედეგები ცნობილი ხვალისთვის იქნება. უბანზე ხმის დათვილის პროცედურა ჯერ არ დასრულებულა. აქ დასადგენია გაბათილებული ბიულეტენების რიცხვი. ,,ქართული ოცნების” წარმომადგენლებმა გამარჯვება ფეიერვერკით უკვე აღნიშნეს.

     17:00 საათის მონაცემებით, ახალქალაქის #1–ელ უბანზე ამომრჩეველთა დაახლოებით 35%–იანი აქტივობა ფიქსირდება. აქ რეგისტრირებული 1521 პირიდან საკუთარი არჩევანი 556–მა მათგანმა გააკეთა. საარჩევნო უბანი ზუსტად 20:00 საათზე დაიხურება, რის შემდეგაც ხმების დათვლის პროცესი დაიწყება. ამ დროისათის, #40–ე ახალქალაქის საოლქო საარჩევნო კომისიაში საჩივარი არ შესულა. #1–ელ უბანზე კი ერთი განცხადება ,,მრავალეროვანი საქართველოს” წარმომადგენლებმა დაწერეს. მათი თქმით,  ამომრჩეველი, რომელმაც საკუთარი პოზიცია გადასატანი ყუთის  მეშვეობით დააფიქსირა, ხმის მისაცემად უბანზეც მივიდა.  განცხადების საფუძველზე, აღნიშნულ ამომრჩეველს #1–ელ უბანზე კენჭისყრის პროცესში მონაწილეობა აღარ მიუღია. განმეორებითი კენჭისყრის შედეგების დათვლა 20:00 საათის შემდეგ დაიწყება.

     ,,არასაპარლამენტო ოპოზიციის” წარმომადგენლებს ახალქალაქის #1–ელ საარჩევნო უბანზე გამარჯვების იმედი აქვთ. მათი თქმით, არ დაუშვებენ, რომ კოალიცია ,,ქართული ოცნების” გამგებლობის კანიდატმა პოსტი დაიკავოს. პარტიის ერთ–ერთი ლიდერი, კახა კუკავა ირწმუნება, რომ ახალქალაქში კონტრდაზვერვის თანამშრომლები ამომრჩევლებს უბანზე მისვლას უკძლავენ. ,,არასაპარლამენტო ოპოზიციის”  ლიდერები, #40–ე საარჩევნო ოლქში დაფიქსირებული დარღვევების გამო, საოლქო საარჩევნო კომისიის თავმჯდომარის, ჰასმიკ მარაგოზიანის პასუხისმგებლობაში მიცემის საკითხზეც საუბრობენ. შეგახსენებთ, რომ დღეს ახალქალაქში #1–ელ საარჩევნო უბანზე მაჟორიტარი დეპუტატი აირჩევა. მოსახლეობამ საკუთარი არჩევანი 4 კანდიდატს შორის უნდა გააკეთოს:  ,,არასაპარლამენტო ოპოზიცია” –გრიგოლ წურწუმია #1  ,,ერთიანი ნაციონალური მოძრაობა” – აღას გრირორიანი #5 ,,ქართული ოცნებია”– ნაირ ირისიანი #41 დამოუკიდებელი კანდიდატი –ნორაირ ტეპოიანი #42 2014 წლის თვითმმართველობის არჩევნების განმეორებითი კენჭისყრა 9 ოლქის 14 უბანზე მიმდინარეობს: ▪ №22 მარნეულის საარჩევნო ოლქის – №25 და №57 საარჩევნო უბნები; ▪ №26 თეთრიწყაროს საარჩევნო ოლქის – №5 საარჩევნო უბანი; ▪ №28 დუშეთის საარჩევნო ოლქის – №4,  №6, №47 და №52 საარჩევნო უბნები; ▪ №40 ახალქალაქის საარჩევნო ოლქის – №1 საარჩევნო უბანი; ▪ №55 ხონის საარჩევნო ოლქის – №22 საარჩევნო უბანი; ▪ №57 ტყიბულის საარჩევნო ოლქის – №2 და №5 საარჩევნო უბნები; ▪ №67 ზუგდიდის საარჩევნო ოლქის – №32 საარჩევნო უბანი; ▪ №79 ბათუმის საარჩევნო ოლქის – №103 საარჩევნო უბანი; ▪ №81 ქობულეთის საარჩევნო ოლქის – №34 საარჩევნო უბანი.  

      ახალქალაქში, #1–ელ საარჩევნო უბანზე მყოფმა ,,არასაპარლამენტო ოპოზიციის” წარმომადგენლებმა  ჟურნალისტებს 104 კაციანი სია წარმოუდგინეს. პოლიტიკური ბლოკის ერთ–ერთი ლიდერის, ბეჟან გუნავას  განმარტებით, ნუსხაში გარდაცვლილი პირებისა და იმ ამომრჩეველთა სახელები და გვარებია, რომლებიც ამ დროისათვის საქართველოში არ იმყოფებიან. მისივე მტკიცებით, აღნიშნული 104 პირი ერთ–ერთ უბანზე იყო რეგისტრირებული და 15 ივნისის არჩევნებში მონაწილეობდა. ამ ეტაპზე იგი უბანს არ აკონკრეტებს. ბეჟან გუნავას თქმით, აღნიშნულს ,,არასაპარლამენტო ოპოზიცია”  გაასაჩივრებს. შეგახსენებთ, რომ ახალქალაქის #1–ელ საარჩევნო უბანზე, ამ დროისათვის განმეორებითი კენჭისყრა მიმდინარეობს.  12 საათის მონაცემებით, აქ რეგისტრირებული 1521 პირიდან საკუთარი პოზიცია მხოლოდ 200 მათგანს ჰქონდა დაფიქსირებული, ამ წუთებში ამომრჩეველთა ნაკადმა იმატა. აღნიშნული კენჭისყრის საფუძველზე ამომრჩევლები მაჟორიტარ დეპუტატებს აირჩევენ, რომელთა მეშვეობითაც ახალქალაქის 37 კაციანი საკრებულო დაკომპლექტდება. მასში 6 დეპუტატი ,,არასაპარლამენტო ოპოზიციიდან” შევა.

     #40–ე ახალქალაქის საარჩევნო ოლქში 5 უბანზე ხმები განმეორებით გადაითვლება. ეს გადაწყვეტილება ახალქალაქის რაიონულმა სასამართლომ გამოიტანა,  რომელმაც ბლოკ ,,არასაპარლამენტო ოპოზიციის” 1 სარჩელი, 27 ივნისს, 4 კი გუშინ დააკმაყოფლა. პოლიტიკური პარტიის წარმოამდგენელთა განმარტებით, უბნებზე ხმები გაყალბდა. აღნშნულთან დაკავშირებით, მათ სასამართლოს ვიდეო მასალა წარუდგინეს. როგორც ,,არასაპარლამენტო ოპოზიციის” ლიდერები ამბობენ, 5–ივე უბანზე ბიულეტენები თავიდან დაითვლება, რომლის მიხედვითაც შესაძლებელია არა მხოლოდ გამარჯვებული დეპუტატის, არამედ ახალქალაქის გამგებლობის კანდიდიატიც შეიცვალოს. შეგახსენებთ, რომ 15 ივნისის, არჩევნების შედეგად, #40–ე ახალქალაქის საარჩევნო ოლქში გამარჯვება ,,ქართული ოცნების” მიერ წარმდგენილმა სუბიექტებმა მოიპოვეს. აქ 5 საარჩევო უბანზე ხმები განმეორებით მას შემდეგ დაითვლება, რაც #1–ელ უბანზე  ხელახალი კენჭისყრის შედეგები ცნობილი იქნება.

   ახალქალაქის  #1–ე უბანზე ადგილობრივი თვითმმართველობის არჩევნების განმეორებითი კენჭისყრა მიმდინარეობს. ამჯერად, ამომრჩევლები  ხმას მხოლოდ დეპუტატობის კანდიდატს აძლვენ. უბანზე  1521 პირია რეგისტრირებული, მათგან 43 საკუთარ პოზიციას გადასატანი ყუთის მეშვეობით დააფიქსირებს. როგორც #40–ე ახალქალაქის საარჩევნო ოლქში განმარტავენ, 12 საათისათვის ამომრჩეველთა 10%–იანი აქტივობა ფიქსირდება. საარჩევნო პროცესს ადგილზე აკვირდებიან სხვადასხვა არასამთავრობო ორგანიზაციების წარმომადგენლები. #1–ელ საარჩევნო უბანზე იმყოფებიან ,,არასაპარლამენტო ოპოზიციის” ლიდერები: კახა კუკავა და ბეჟან გუნავა. შეგახსენებთ, რომ ახალქალაქის #1–ელ უბანზე განმეორებითი არჩევნები ბლოკ ,,არასაპარლამენტო ოპოზიციისა” და ,,მრავალეროვანი საქართველოს” სარჩელის საფუძველზე გაიმართა. მათ მიერ 15 ივნისს, #1–ელ საარჩევნო უბანზე   დაფიქსირებული დარღვევების გამო, კომისიის თავმჯდომარესა და მდივანს 500–500 ლარის ოდენობის ჯარიმა დაეკისრათ. დღევანდელ არჩევნებს კი #1–ელ  უბანზე #4–ე  საარჩევნო უბანის კომისია ატარებს. ამ დროისათვის, #40–ე ახალქალაქის საარჩევნო ოლქში საჩივარი არ შესულა.

დღეს ოლქის თავმჯდომარემ კომისიის ცამეტივე წევრთან ერთან ოქმები შეაჯამა და იმ კანდიდატების ვინაობა კიდევ ერთხელ დაასახელა, ვინც თვითმართველობის არჩევნებზე 4%–იანი ბარიერი გადალახა.  24  ხელმოწერილი ოქმი ხვალ უკვე ცენტრალურ საარჩვენო კომისიას გადაეგზავნება.

ახალციხის   მუნიციპალიტეტის ყოფილი გამგებლის ბესიკ ბლიაძის სასამათლო სხდომა გადაიდო. რაიონულ სასამართლოში, პროცესზე  პროკურორ მამუკა ქომოშვილის ნაცვლად ოთარ სანდოძე გამოცხადდა, რომელმაც შუამდგომლობა სხდომის გადადების თაობაზე დააყენა იმ მიზეზით, რომ საქმის დეტალებს არ იცნობდა. პროკურორის განმარტებით ქომოშვილი მივლინებით დედაქალაქში იმყოფება, მისთვის კი სამი საათით ადრე გახდა ცნობილი, რომ სასამართლოზე თავად უნდა გამოცხადებულიყო.

ახალციხის თვითმართველ ქალაქსა და თემში საკრებულოებს საოლქო კომისია დააკომპლექტებს და პირველ სხდომას ჩაატარებს. როგორც ოლქში განმარტავენ საარჩვენო კოდექსის მიხედვით, ეს პროცესი არჩევნების შემაჯამებელი ოქმის დაწერის შემდეგ დაიწყება. მანამდე კი ახალციხის მუნიციპალიტეტს კვლავ გამგებელი და ერთი საკრებულო მართავს.

მართლმსაჯულების ორგანოში პირველი სხდომა 22 ივნისს ჩატარდა, სადაც 19-ე, 34-ე და 46-ე უბნებზე დარღვევების შესახებ, პარტიის მიერ შეტანილი სარჩელი  განიხილეს. „არასაპარლამენტო ოპოზიცია”  აღნიშნული უბნების ხელახლა გადათვლასა და  ამის მიხედვით არჩვენების თავიდან ჩატარებას ითხოვდა, თუმცა მოსამართლე არარატ ესოიანმა სარჩელი არ დააკმაყოფილა.

დღეს „ახალგაზრდა იურისტთა ასოციაციის“ ორი  სარჩელი  #37–ე ახალციხის საოლქო საარჩევნო კომისიის გადაწყვეტილებასთან დაკავშირებით,  რაიონულმა  სასამართლომ განიხილა. პირველი სხდომა 16:15 საათზე დაიწყო.  პროცესს, მეორე და მეოცე უბნების კომისსიის თავმჯომარეები, მდივნები ასევე სხვადასხვა პარტიის წარმომადგენლები დაესწრნენ, სადაც მხარეებმა საკუთარი მტკიცებულებები და არგუმენტები წარმოადგინეს.

ახალქალაქში განვითარებულ მოვლენებთან დაკავშირებით, დღეს პრესკონფერენცია გამართა არასაპარლამენტო ოპოზიციის ერთერთმა ლიდერმა ფიქრია ჩიხრაძემ. როგორც მან სააგენტო ,,პირველის“ პრესკლუბში“ განაცხადა, არჩევნების გაყალბება ყველაზე ანტისახელმწიფოებრივ ქმედებად შეიძლება შეფასდეს. ,,მე პირადად არ მივეკუთვნები ისეთ პოლიტიკოსთა რიგს, რომელსაც უყვარს რაიმეს გაზვიადება და წაგებული ომის შემდგომ მჯიღების ქნევა. ჩვენ პირველ ორ დღეს საერთოდ არ გაგვიკეთებია არანაირი საპროტესტო განცხადება, რადგანაც ჩავთვალეთ რომ დაბალი აქტივობის პირობებში მივიღეთ ის შედეგი რაც , რომელიც არ აღმოჩნდა საკმარისი ბარიერის გადასალახად. მაგრამ შემდეგ ჩვენი წარმომადგენლებისგან მოწოდებულმა ინფორმაციამ, დაგვანახა სხვა სურათი, რაც აშკარად არ ჯდება სამართლიანი არჩევნების ჩატარების ჩარჩოში“. მისი თქმით, არჩევნების შედეგები ტოტალურად გაყალბდა. ,,სრული დარწმუნებით შემიძლია ვთქვა, რომ არასაპარლამენტო ოპოზიციის გამგებლობის კანდიდატი ახალქალაქში, არტაშეს ფალანჯიანი არის გამარჯვებული პირველსავე ტურში და პროპორციული ნაწილი არის მოგებული“ ფიქრია ჩიხრაძემ ბოლო დღეებში,  ახალქალაქში სპეცსამსახურების მობილიზებაზეც ისაუბრა და აღნიშნა, რომ ეს დაუშვებელია, რასაც არჩევნებთან არანაირი კავშირი არ შეიძლება ჰქონდეს. ,,იქ მობილიზებული იყო მთელი სპეცსამსახურები და კონტრდაზვერვა, საერთოდ რა ესაქმება კონტრდაზვერვას არჩევნებთან, აბსოლიტურად გაუგებარია. ეს ხალხი როგორც ქართველები ასევე სომხები იყვნენ საპროტესტოდ გამოსულები, მშვიდობიანად. ეს არის ხალხი, რომელიც მართლა სახელმწიფოებრივად აზროვნებს. ვერავინ ვერ მოახერხებს იმას რომ მათ სეპარატისტული იარლიყი მიაკეროს, ისინი იბრძვიან თავისი უფლებისათვის.“ ,,უსერიოზულესი კანონდარღვევაა, ის ყველაფერი რაც ხდება ახალქალაქში. ,,მრავალეროვანი საქართველოს“ დამკვირვებლების მიერ გადაღებულ ვიდეოფაილებში დაფიქსირებულია, ბევრი დარღვევა.  ეს ყველაფერი წავა სასამართლოში. ჩვენ ბოლომდე ვაპირებთ ვიბრძოლოთ ახალქალაქის ხმებისათვის“-განაცხადა მედიასთან ,,ახალი მემარჯვენეების” ლიდერმა ფიქრია ჩიხრაძემ. წყარო: http://topnews.mediamall.ge/?id=111801

ახალქალაქში ოთხი საუბნო საარჩევნო კომისიის თავმჯდომარე და მდივნები 500-500 ლარით დაჯარიმდებიან-ეს გადაწყვეტილება 19 ივნისს #40 ახალქალაქის საარჩევნო ოლქის კომისიამ გამოიტანა. კომისიამ არ დაკმაყოფილა „არასაპარლამენტო ოპოზიციის” მიერ წარდგენილი საჩივრების უმრავლესობა, რომელიც  პარტიის ხმების გაყალბებას უკავშირდებოდა. ახალქალაქში სამდღიანი პროტესტი დასრულდა თუმცა, კახა კუკავა ბრძოლის გაგრძელებას სასამართლოში  აპირებს.

„ახალგაზრდა იურისტთა ასოციაციამ“ #37–ე საოლქო საარჩევნო კომისიის გადაწყვეტილება  სასამართლოში გაასაჩივრა. ორგანიზაციის იურისტმა დღეს ახალციხის რაიონულ სასამართლოში ორი სარჩელი შეიტანა. ორივე მათგანი უბნებიდან შესულ შემაჯამებელ ოქმებში დაშვებულ დარღვევებს შეეხებოდა.