"მოჰყავთ ბავშვები მაღალი სიცხით" - ახალციხეში ვირუსების შემთხვევებმა იმატა
00:47 / 12.01.2020
ახალციხეში ვირუსული ინფექციების შემთხვევებმა იმატა. ქალაქის ორივე კლინიკაში, ბოლო 10 დღეა, პაციენტების რაოდენობა თანდათან იზრდება. ისინი სამედიცინო დაწესებულებაში ძირითადად, მაღალი სიცხით, ხველებით, სურდოთი და ღებინებით შედიან.
ახალციხის რეფერალურ ჰოსპიტალში ამბობენ, რომ მათთან შესული პაციენტების მდგომარეობა მსუბუქი და საშუალო სიმძიმისაა. დღეის მდგომარეობით, სტაციონარში 25 პაციენტი რჩება, დანარჩენებს ამბულატორიული მკურნალობა ჩაუტარდათ და გაეწერნენ.
კლინიმა "იმედს", პირველი იანვრიდან დღემდე, 300-მდე პირმა მიმართა, აქედან 20 პაციენტის ჰოსპიტალიზაცია გახდა საჭირო. მათი ასაკი ძირითადად, 0-დან 6 წლამდეა. პაციენტები კლინიკაში საშუალოდ, 5 დღის განმავლობაში რჩებიან.
ორივე სამედიცინო დაწესებულებაში ამბობენ, რომ ძირითადად, A და B ტიპის ვირუსი ცირკულირებს. თუმცა საერატო მდგომარეობა საგანგაშო არ არის. შესაბამისად, სასკოლო არდადეგების გახანგრძლივების მიზეზს, მედიკოსები ვერ ხედავენ.