ჯანდაცვა
კოვიდინფიცირებასთან ერთად გაზრდილი სიკვდილიანობა
საქართველოში კორსონავირუსის დღიურმა შემთხვევებმა ბოლო პერიოდში 3 000-ს გადააჭარბა. გაიზარდა COVID 19-ით გარდაცვლილთა რაოდენობაც. 2020 წლის 26 თებერვლიდან დღემდე, ამ დიაგნოზით, საქართველოს მასშტაბით 703 ადამიანია გარდაცვლილი, მათგან სამცხე-ჯავახეთში - 10 პირია.

სამცხე-ჯავახეთში კორონავირუსით ბოლო ორი გარდაცვლილი ადიგენის მუნიციპალიტეტის სოფელ უდიდან იყვნენ. 80 წლამდე მამაკაცი ახალციხეში ცხოვრობდა. ინფიცირებული თავდაპირველად, სახლის პირობებში მკურნალობდა, შემდეგ კი კოვიდმიმღებ საავადმყოფოში გადაიყვანეს. მამაკაცს თანმხლები დაავადებები ჰქონდა.

60 წლამდე ქალიც სოფელ უდიდან იყო და თბილისში ცხოვრობდა. იგი კორონაავირუსის დიაგნოზით 14 ნოემბერს გარდაიცვალა. ორივე მათგანი სოფელ უდეში დაკრძალეს.
HDV. ge–ს ფოტო

კორონავირუსის დიაგნოზით გარდაცვლილი 89 წლის პაციენტი ქალაქ ვალიდან პირველი იყო მათ შორის, ვინც სამცხის ტერიტორიაზე კოვიდინფიცირების შედეგად გარდაიცვალა.

ასაკიანი ქალი თითქმის ორი თვის განმავლობაში ახალციხის კლინიკა „იმედში“ სხვა დაავადებებით მკურნალობდა. პაციენტის ნათესავები ამბობენ, რომ მკურნალ ექიმს იგი რამდენიმე დღეში უნდა გამოეწერა. თუმცა, ქალის კლინიკაში ყოფნის დრო, მედიკოსების კორონავირუსით ინფიცირების პერიოდს დაემთხვა. გადამოწმების მიზნით ჩატარებული გამოკვლევის შემდეგ კი მას კორონავირუსი დაუდგინდა.

89 წლის ქალი თბილისში, კოვიდმიმღებ საავადმყოფოში გადაიყვანეს, სადაც მეორე დღეს გარდაიცვალა. ქალის ოჯახის წევრებს კორონავირუსით მისი გარდაცვალების არ სჯერათ.

„ერთ დღეში ქალს კორონაც შეახვედრეს და გარდაიცვალა კიდეც, როცა უკვე საავადმყოფოდან მის გამოწერას აპირებდნენ. დასჭირდათ და გარდაცვალების დოკუმენტში კორონავირუსი ჩაუწერეს“ – აცხადებს გარდაცვლილი ქალის ოჯახის წევრი.


კორონავირუსით გარდაცვლილი ქალი ვალეში 16 ოქტომბერს დაკრძალეს. გარდაცვლილის ოჯახის წევრები "მეცხრე არხთან" აცხადებენ, რომ ცხედარი სპეციალური ავტომობილით ჩამოსვენეს და პირდაპირ სასაფლაოზე მიასვენეს. ცხედარი ოჯახის ახლობლებლებმა დაკრძალეს, თუმცა მათ არ მიეცათ საშუალება ქალის სხეული დაკრძალვამდე სახლში დაესვენებინათ, პანაშვიდი გადაეხადათ და სამძიმარი მიეღოთ.

"მძღოლი მოვიდა, მანქანა გააჩერა, საბარგული გახსნა, ჩვენ სასახლე ავწიეთ და წავიყვანეთ. არავინ იყო, არც პოლიცია. შევიყვანეთ, დავასაფლავეთ. არც გარდაცვალების საბუთი, არც რაიმე სახის დოკუმენტაცია დაუტოვებიათ. ასე რომ ვთქვათ, მოვიდნენ, დაცალეს მანქანა და წავიდნენ“
– აცხადებს კორონავირუსის
დიაგნოზით გარდაცვლილი ქალის ოჯახის წევრი.
ვალელი ქალის გარდაცვალებიდან ორი თვის შემდეგ, დაავადებათა კონტროლის ეროვნული ცენტრის ხელმძღვანელმა განაცხადა, რომ კორონავირუსით გარდაცვლილი ადამიანის ცხედარი, დაავადების გავრცელების თვალსაზრისით, არავითარ რისკს არ წარმოადგენს. ამირან გამყრელიძის თქმით, გარდაცვლილისთვის პანაშვიდის გადახდა უსაფრთხოა.

„კორონავირუსით გარდაცვლილი ადამიანის ცხედრის სახლში დასვენება ნამდვილად უსაფრთხოა და ყველა რიტუალის დაცვით შეიძლება ეს ყველაფერი გაკეთდეს, სასურველია, რომ ეს მოხდეს 72 საათის განმავლობაში. ინფექციის გავრცელების ერთ-ერთი მთავარი რისკ–ფაქტორი არის დიდი თავშეყრები, იქნება ეს თავშეყრა სასიხარულო თუ დაკავშირებული გარდაცვალებასთან და ჩვენს შესაბამის რიტუალებთან, რაც გვაქვს ტრადიციულად. ამიტომ, ჩვენ ყოველმხრივ თავი უნდა შევიკავოთ დიდი თავშეყრებისგან,“- განაცხადა ამირან გამყრელიძემ.

სამცხე-ჯავახეთში კორონავირუსით გარდაცვალების პირველი შემთხვევა ახალქალაქის სოფელ აბულში დაფიქსირდა. რეგიონში გარდაცვლილ პაციენტებს შორის ყველაზე ახალგაზარდა ნინოწმინდის სოფელ დილიფში მცხოვრები 32 წლის ქალი იყო. კორონავირუსის დიაგნოზით, 10 პაციენტი სამცხე-ჯავახეთის ექვსივე მუნიციპალიტეტში გარდაიცვალა. მათ შორისაა 67 წლის სასწრაფო-სამედიცინო დახმარების ექიმი ახალქალაქიდან.

რატომ იზრდება კორონავირუსით გარდაცვლილთა რაოდენობა რეკორდული სისწრაფით საქართველოში, უცნობია. ახალციხეში გამოკითხული ადგილობრივები ფიქრობენ, რომ ეს მოსახლეობის დაუდევრობამ და დაწესებული რეგულაციების უგულვებელყოფამ გამოიწვია. მათი ნაწილი ექიმებს უყურადღებობაში ადანაშაულებს, ნაწილი კი მიიჩნევს, რომ სახელმწიფომ სათანადო ზომები დროულად არ მიიღო.


ქვეყანაში უკვე პრობლემაა საწოლებისა და ტესტების სიმცირე, რაც კოვიდ19-ის შემთხვევევების გამწვავებასა და სიკვდილიანობის ზრდას იწვევს - აცხადებს ეპიდემიოლოგი ანაიდ ლოკიანი. მედიკოსი დიდი ხნის წინ ვარაუდობდა, რომ ქვეყანა ამ რეალობის წინაშე მეორე ტალღის პერიოდში აღმოჩნდებოდა.

განსხვავებული მოსაზრება აქვს კლინიკა „სიხარულის“ მთვარ ექიმსა და დირექტორს კობა კაკაჩიშვილს. მისი თქმით, კოვიდ19-ით ინფიცირებულთა რაოდენობისგაზრდა თავისთავად ნიშნავს გარდაცვალების შემთხვევევის ზრდასაც. მედიკოსის განმარტებით, კორონავირუსი სირთულეებით ასაკოვანი და თანმხლები დაავადებების მქონე პირების შემთხვევაში გამოირჩევა. ინფექცია ჰაერის უკმარისობასა და ფილტვების ანთებას იწვევს, რაც ზოგიერთი პაციენტისთვის ფატალურად სრულდება. კოვიდ 19-ის ერთ-ერთ უარყოფით თვისებად ექიმი, ადამიანიდან ადამიანზე მარტივად გადაცემას ასახელებს.


Worldometer-ის ვებ-გვერდის მიხედვით, მსოფლიოს ქვეყნებიდან კოვიდ 19-ით გამოწვეული სიკვდილიანობის მაღალი მაჩვენებლით ამერიკა ლიდერობს. მეორე ადგილი კი ინდოეთს უჭირავს.

გამოცემულია საქართველოს ღია საზოგადოების ფონდისა და საქართველოს სტრატეგიის და განვითარების ცენტრის (GCSD) ფინანსური მხარდაჭერით. ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს ფონდისა და ცენტრის პოზიციას. შესაბამისად, ღია საზოგადოების ფონდი და საქართველოს სტრატეგიის და განვითარების ცენტრი არ არიან პასუხისმგებელი მასალის შინაარსზე.
| Print |