რეგიონის კლინიკებში წინა წლებთან შედარებით ნაკბენით მიმართვიანობა გაზრდილია
23:17 / 03.08.2022
სამცხე-ჯავახეთი ვირუსის კერადაა აღიარებული. რეგიონის კლინიკებში წინა წლებთან შედარებით ტკიპით ნაკბენის მიმართვიანობა გაზრდილია. ყირიმ-კონგოს დიაგნოზით, ინფექციურ საავადმყოფოში ყველაზე მეტი პაციენტი სამცხე ჯავახეთიდან შეჰყავთ.
გასულ თვეში სამცხე-ჯავახეთში ყირიმ-კონგოს 10-მდე შემთხვევა დაფიქსირდა. როგორც სამედიცინო სფეროს წარმომადგენლები ამბობენ, რეგიონში რამდენიმე პაციენტი მკურნალობას საავადმყოფოში ამ დრომდე გადის. მათი ჯანმრთელობის მდგომარეობა დამაკმაყოფილებელია.
სპეციალისტები ადასტურებენ, რომ წინა წლებთან შედარებით წელს ყირიმ-კონგოს გაცილებით მეტი შემთხვევაა, ექიმები მოქალაქეებს ურჩევენ, განსაკუთრებული სიფრთხილე გამოიჩინონ და ყირიმ-კონგოს დამახასიათებელი სიმპტომების აღმოჩენისთანავე მიაკითხონ სამედიცინო დაწესებულებებს.
შეგახსენებთ, რომ ორ აგვისტოს, ბორჯომის მუნიციპალიტეტის სოფელ საკირეში, ყირიმ-კონგოს ცხელებით 45 წლის კაცი გარდაიცვალა.