საქართველოს საპატრიარქომ სასულიერო პირებს და ეკლესიის ღირებულებების გამზიარებლებს „რუსთავი 2-სთვის“ ბოიკოტის გამოცხადება მოსთხოვა.

სამაუწყებლო კომპანიის ხელმძღვანელი ნიკა გვარამია დარწმუნებულია, რომ ეს მხოლოდ იმ ერთი ჯგუფის განცხადებაა, რომელსაც საპატრიარქოში განსაკუთრებული გავლენა აქვს. საპატრიარქოს განცხადებას წინ უძღოდა მეუფე იობის ქადაგება, სადაც მღვდელმთავარმა გადაცემა „არჩევანის“ წამყვანი გიორგი გაბუნია ამბიონიდან დაწყევლა და შეაჩვენა. გთავაზობთ სოციალური ქსელში, იმ რეაქციას, რომელიც განვითარებულ მოვლენებს უკავშირდება.

სამაუწყებლო კომპანიის გენერალური დირექტორი ნიკა გვარამია: „საზოგადოებამ იცის, რომ ჩვენ ბოდიშის მოხდაც არ გვიჭირს, შეცდომების აღიარებაც არ გვიჭირს, მიუხედავად იმისა, რომ ამ ვითარებაში სრულიად დარწმუნებული ვარ, რომ არც საბოდიშო არაფერი გვაქვს და არც შეცდომა არ დაგვიშვია. ძალიან სამწუხაროა თუ ვინმეს პირადი გრძნობები შეილახა, ეს არ ყოფილა მიზანი, მიუხედავად ამისა, ამის გამო ვწუხვარ, მაგრამ არავითარ ბოდიშს არ იმსახურებს ამ წერილის გამომქვეყნებელი ორგანიზაცია, შავრაზმული, ქვეყნის და ეკლესიის წინააღმდეგ მებრძოლი დაჯგუფება ადამიანებისა, რომლებიც პირდაპირ აღვივებენ შუღლს ადამიანებს შორის და ებრძვიან სიტყვისა და გამოხატვის თავისუფლებას“.

დეკანოზი თამაზ ლომიძე: ჩემი აზრით, თვითმკვლელი ღვთისმშობელი ძალიან ვულგარული და უხეში ფორმაა მხატვრის ჩანაფიქრის გამოსახატად. ალბათ, ზუსტად ამ მტკივნეული ეფექტის გამოწვევა უნდოდა მხატვარს. მას რა თქმა უნდა არ ესმის საღვთისმეტყველო თვალსაზრისითაც რომ სრული აბსურდია ეს სიუჟეტი, მაგრამ ის მაინც უნდა სცოდნოდა, რომ თვითმკვლელობა აბსოლუტურად დაუშვებელი ცოდვაა ქრისტიანებისთვის და ქრისტეს დედასთან, რომელიც ბავშვობიდან ღმერთს იყო მიძღვნილი და ემსახურებოდა ღვთის განკაცების განგებულებას, სრულიად შეუფერებელია მისი დაკავშირება. მოკლედ, გარდა იმისა, რომ შეურცხმყოფელია ქრისტიანებისთვის, ვულგარული და უკიდურესად უხეში ნახატია!

როცა განკაცებული ღმერთი ავაზაკივით შეიპყრეს, ცილი დასწამეს, აგინეს, თავში ჯოხით სცემეს, აფურთხეს (სახარებაში ასე წერია), გაშოლტეს, სახეში სილა გააწნეს და ბოლოს ჯვარზე მიაჭედეს, მაინც არ დაუწყევლია მისი მაგინებლები და მამა ღმერთს ასე ევედრებოდა მათთვის: გთხოვ, "აპატიე მამაო, რამეთუ არ ესმით, რას ჩადიანო." სწორედ ამით გაიმარჯვა ქრისტიანობამ და ყველა ქრისტიანი ვალდებულია მიბაძოს ქრისტეს! ეკლესიას (მხოლოდ საეკლესიო კრებას) აქვს უფლება და მოვალეობაც, რომ თუ ვინმე ამახინჯებს მოძღვრებას ან აღარ აღიარებს მას და ამით აზიანებს ეკლესიის სხეულს, უკიდურეს და ბოლო, გამოუვალ შემთხვევაში ასეთი ქრისტიანი მოაშოროს ანუ განკვეთოს ეკლესიიდან. ესაა ანათემა და ეკლესია მუდამ ელოდება მის უკან დაბრუნებას სინანულის და გამოსწორების შემთხვევაში. მაგრამ არავისა აქვს უფლება დაწყევლოს ადამიანი მის საწამებლად ან გასანადგურებლად. ეს ორი რამ არ უნდა აგვერიოს ერთმანეთში.

საქართველოს ექსპრეზიდენტი მიხეილ სააკაშვილი: გიორგი გაბუნია არის ძალიან კარგი ჟურნალისტი, მაგრამ ამ ბოლო დღეებში, მისი გამოსვლა, სხვა არაფერი იყო, თუ არა დიდი შეცდომა და ჩავარდნა. ყველას უნდა ესმოდეს, რომ ზღვარგადასული არ ვარგა არაფერი. ღვთისმშობლის აგდებულად მოხსენება შეურაცხყოფს ყველა მორწმუნე ქრისტიანის გრძნობებს, ისევე როგორც საკუთარი დედის აუგად მოხსენიება. პირადად ჩემთვის, ეს იყო ძალიან უსიამოვნო სანახავი. ვთხოვ ყველას, გავუფრთხილდეთ ერთმანეთის გრძნობებს და თავი შევიკავოთ უაზრო წყენის მიყენებისგან და როდესაც ასეთი რამ ხდება, ჩვენ გვაქვს უფლება მოვითხოვოთ საჯარო ბოდიში! ამავე დროს, მიუღებელია ამ თემის, ერთი ჟურნალისტიდან, მთლიანად რუსთავი ორზე განვრცობა და მთელს ტელევიზიაზე აგრესიის გადატანა, რაც პირდაპირ შედის ქართველი ხალხისა და საქართველოს ეკლესიის მტრის, ბიძინა ივანიშვილის, ინტერესებში!


პარლამენტის წევრი გია ვოლსკი: “საპატრიარქომ ძალიან სწორ აქცენტებზე აგებული განცხადება გამოაქვეყნა "რუსთავი 2"-ის ბოლო პერიოდის ზოგიერთ სიუჟეტთან დაკავშირებით, ძირითადი არსი ასეთია - პროვოკაცია განგებ ხდება დაპირისპირებების გაღვივებისათვის და დასავლური ფასეულობები არ არის რელიგიური გრძნობების შეურაცხყოფის დაშვება. დავამატებდი, რომ დაპირისპირებები და "ცენზურასთან" დაახლოებული კომენტარები სჭირდებათ საერთაშორისო სასამართლოში პოზიციების გასაძლიერებლად. აგერ "პრიმაკოვის ფონდიც" წამოსწიეს, რომლის არსებობა არც არავინ იცოდა, სანამ საპროტესტო აქციაზე არ გამოჩნდა მაუწყებლის ეზოში. არაფერი ახალი, ესაა ნაცმოძრაობის ერთ-ერთი სტრატეგიული მიმართულება - გარეთ საქართველოს "ბნელი ძალების" სათარეშოდ წარმოდგენა, შიგნით საპროტესტო მუხტის შექმნა, რომელიც შესაძლოა კანონს დაუპირისპირდეს და სახელმწიფოს შესაბამისი ზომების მიღება აიძულოს“