აზერბაიჯანის, სომხეთის და რუსეთის ლიდერებს შორის სამმხრივი შეხვედრა გაიმართა
12:40 / 30.11.2021
სომხეთის, აზერბაიჯანისა და რუსეთის ლიდერებს შორის პირისპირ შეხვედრა გაიმართა. სოჭში გამართული სამმხრივი შეხვედრის დასრულების შემდეგ, რუსეთისა და აზერბაიჯანის პრეზიდენტებმა და სომხეთის პრემიერ-მინისტრმა განცხადებები გააკეთეს.
მოლაპარაკებების ყველა მონაწილემ შეხვედრა შეაფასა, როგორც ეფექტიანი, უაღრესად სასარგებლო და დროული. მოლაპარაკებების შემდეგ მხარეებმა ერთობლივი განცხადება მიიღეს. მომავალ კვირას კიდევ ერთი სამმხრივი შეხვედრა გაიმართება იმავე შემადგენლობით - უკვე მოსკოვში.
მხარეებმა რუსეთის სამშვიდობო მისიის მნიშვნელოვანი წვლილი აღნიშნეს სიტუაციის სტაბილიზაციასა და რეგიონში უსაფრთხოების უზრუნველყოფის საქმეში.
„ჩვენ შევთანხმდით ერთობლივი ძალისხმევის გააქტიურებაზე, რომელიც მიზნად ისახავს 2020 წლის 9 ნოემბრის და 2021 წლის 11 იანვრის განცხადებებიდან გამომდინარე დარჩენილი საკითხების დაუყოვნებლივ გადაწყვეტას“, - ნათქვამია ერთობლივ განცხადებაში.
ეს ყარაბაღის მეორე ომის დასრულების შემდეგ ნიკოლ ფაშინიანისა და ილჰამ ალიევის მეორე პირისპირ შეხვედრა იყო ვლადიმირ პუტინის შუამავლობით. შეხვედრას წინ უძღოდა სომხეთ-აზერბაიჯანის საზღვარზე მომხდარი შეიარაღებული დაპირისპირება, რასაც ორივე მხრიდან მსხვერპლი მოჰყვა.