"ცოლის და შვილის გადასარჩენად ცეცხლმოკიდებულ სახლში შევარდა" - რას ჰყვებიან ხანძრის თვითმხილველები
13:03 / 10.06.2022
ხანძრის თვითმხილველი თამარ ბურდული "მეცხრე არხთან" მომხდარს იხსენებს. მისი თქმით ხანძარი მაშინ შენიშნა, როცა ფანჯრის ჩამსხვრევის ხმა გაიგონა.
შეგახსენებთ, რომ დღეს ახალციხეში, ბარათაშვილის ქუჩაზე, ე.წ ვერიპლანის დასახლებაში სახლი დაიწვა. ახალციხეში ბარათაშვილის ქუჩაზე გაჩენილი ხანძრის შედეგად დაშავებულია საკრებულოს თავმჯდომარის მოადგილე ამბარცუმ ბაბოიანი. მცირე დამწვრობები აქვს მიღებული მის მეუღლესაც. ამ წუთებში ბაბოიანი კლინიკა "ევექსში" იმყოფება. მომხდართან დაკავშირებით საკრებულოს წევრი კომენტარს არ აკეთებს. ინფორმაციას არ გასცემს არც სამედიცინო დაწესებულება
ხანძარი ბარათაშვილის ქუჩაზე მდებარე ბაბოიანის სახლს დაახლოებით 11:20 საათზე გაუჩნდა. ცეცხლი მეორე სართულს მოედო. ამ დროისთვის ხანძარი ლიკვიდირებულია. ადგილზე რჩებიან სახანძრო სამსახურის ჯგუფები.
ამბარცუმ ბაბოიანის ირგვლივ მსგავსი შემთხვევა პირველი არ არის. 2020 წლის ნოემბერში მისი კუთვნილი ავტომობილი დაიწვა. მსგავსი ინციდენტი მოხდა 2017 წლის 2 დეკემბერსაც, რა დროსაც ამბარცუმ ბაბოიანის ავტომობილთან აფეთქება მოხდა. შედეგად მისი ავტომობილი დაზიანდა.