ახალციხის მუნიციპალიტეტის სოფელ ნაოხრებთან, ახალი ტრაფარეტი გაჩნდა.

მასზე სოფლის სახელი არასწორად და ოთხ ენაზე - სომხურად, ქართულად, ინგლისურად და რუსულად წერია.

„რამდენიმე დღეა დადგეს, არ ვიცი ვინ მოიტანა. საბაჟოს თანამშრომლები, სოფლის რწმუნებული ამ გზაზე დადიან და ამდენი ხანი როგორ ვერ შეამჩნიეს?" - ამბობენ ნაოხრებში.

თვითმმართველობაში ახალი ბანერის შესახებ „მე-9 არხისგან“ შეიტყვეს. „ტრაფარეტების დადგმა ცენტრალურ გზაზე საგზაო დეპარტამენტს ეკუთვნის, სოფლის გზებზე კი ადგილობვრივ ხელისუფლებას. ფიზიკურ პირს ბანერის დადგმის უფლება არ აქვს“, - ამბობენ მერიის პრესსამსახურში.

მას შემდეგ, რაც ბანერზე თვითმმართველობაში შეიტყვეს, უცნობმა პირებმა წარწერა ჩუმად ჩამოხსნეს. ადგილობრივ ხელისუფლებაში ამბობენ, რომ ინფორმაციის მიღების შემდეგ, ნაოხრებში მერის წარმომადგენელი ოვსეფ მელქოიანი ავიდა, თუმცა ბანერი აღარ დახვდა.

„სამი დღის წინ ვიყავი და არ დამინახავს. დღეს ავედი და მხოლოდ ბოძები დამხვდა, ბანერი ჩამოუხსნიათ. არ ვიცი რა ეწერა ზედ“, - განუცხადა „მე-9 არხს“ მერის წარმომადგენელმა წყალთბილის ადმინისტრაციულ ერთეულში.

ტრაფარეტი ცენტრალურ გზაზე იდგა. მერის წარმომადგენლის შემდეგ, ტერიტორია ადგილობრივმა მოსახლეობამაც გადაამოწმა, თუმცა უკანონოდ დამონტაჟებული ბანერი ადგილზე აღარ დახვდათ. 

ბანერი სოფელ ნაოხრებთან