მონაკვეთზე, სადაც ვმუშაობთ, ცეცხლის შეკავება მოხდა - თავდაცვის ძალები
22:23 / 25.08.2022
სტიქიის ზონაში სამხედრო მოსამსახურეების ჩართულობით განხორციელებულ ხანძრის სალიკვიდაციო სამუშაოებს თავდაცვის ძალების მეთაური ტაქტიკურ მართვის პუნქტში უშუალოდ გაეცნო. გენერალ-მაიორ გიორგი მათიაშვილს ხანძრის გავრცელების კერების შესახებ ინფორმაცია აღმოსავლეთის სარდალმა, ბრიგადის გენერალმა როლანდ ძნელაძემ მიაწოდა და ცეცხლის ქრობის პროცესში თავდაცვის ძალების სხვადასხვა ქვედანაყოფის მიერ ჩატარებული და მიმდინარე სამუშაოების შესახებ მოხსენება წარუდგინა.
ჯარების ლოჯისტიკური უზრუნველყოფის სარდლობის, აღმოსავლეთის სარდლობის I ქვეითი ბრიგადისა და საბრძოლო-საინჟინრო ბატალიონის სწრაფი რეაგირების რადიაციული, ქიმიური და ბიოლოგიური დაცვის ასეულის პირადი შემადგენლობა, სტიქიის ზონაში, აღმოსავლეთ სექტორში - სოფელი დვირის მიმართულებით მუშაობს.
სამხედროები ცეცხლის ქრობის პროცესში მეოთხე დღეა აქტიურად არიან ჩართული და სამუშაოებს სპეციალური ლოჯისტიკური საშუალებების - მუხლუხებიანი ყველგან მავალი სახანძრო-სამაშველო ტექნიკის MTLB, წყალმზიდებისა და მაღალი გამავლობის სახანძრო ავტომანქანების დახმარებით ახორციელებენ.
შეგახსენებთ, რომ ხანძარი ბორჯომის ტყეში 19 აგვისტოს გაჩნდა. ქათველებთან ერთად ცეცხლის ქრობის პროცესში ჩართულია თურქეთის ავიაციაც.