მერის სტიპენდიანტები მათ ანგარიშზე დეკემბრის თვის 100 ლარის ჩარიცხვას ელოდებიან. სამცხე–ჯავახეთის სახელმწიფო უნივერსიტეტისა და პროფესიული კოლეჯის – ,,ოპიზარის“ 12 სტუდენტმა ოქტომბრისა და ნოემბრის სტიპენდია უკვე აიღო. თვითმმართველობა დაპირდა, რომ ამჯერად ისინი ხუთი თვის სტიპენდიას მიიღებენ. მერის პირველი სტიპენდიანტები ამბობენ, რომ თავის დროზე მერია მათაც სემესტრის სტიპენდიას დაპირდა, თუმცა მხოლოდ ორი თვის მიიღეს.
ნანა მიქელაძის მოლოდინი, რომ მერის სტიპენდიას ერთი წლის განმავლობაში აიღებდა – არ გამართლდა. დაპირებული 12 თვის ნაცვლად, რვა სტუდენტმა სტიპენდია მხოლოდ ორი თვის მანძილზე მიიღო. სტუდენტი ამბობს, რომ 2015 წელს, მერის სტიპენდია, მაისისა და ივნისის თვის აიღეს. მომდევნო თვეებში თანხა აღარ ჩაერიცხათ. სტუდენტებმა სიტუაციის გარკვევა უნივერსიტეტში, მოგვიანებით კი მერიაში სცადეს. მოგვიანებით გაირკვა, რომ ისინი ორი თვის სტიპენდიას უნდა დასჯერებოდნენ.
მერის ორთვიანი სტიპენდიის, 200 ლარის გამო, სტუდენტებმა, უნივერსიტეტის ექვსთვიანი სტიპენდია, 300 ლარი დაკარგეს. ამბობენ, რომ სწორი ინფორმაციის შემთხვევაში, ისინი მერის სტიპენდიის მიღებას არ დასთანხმდებოდნენ.
ანჟელა არუთუნიანი ის სტუდენტია, რომელიც მერის სტიპენდიანტების სიაში მეორედ მოხვდა. ამბობს, რომ მერის სტიპენდიას მეორედ მას შემდეგ დასთანხმდა, რაც დაზუსტებით შეიტყო, რომ თანხას ამჯერად ხუთი თვის განმავლობაში მიიღებდა.
არასწორი მოლოდინი მერის სტიპენდიაზე, სამცხე–ჯავახეთის სახელმწიფო უნივერსიტეტის ექვსსა და პროფესიული კოლეჯ ,,ოპიზარის“ ორ სტუდენტს ჰქონდა. მერის მოადგილე აღიარებს, რომ სტუდენტებს, ორთვიანი სტიპენდიის შესახებ, წინასწარ ინფორმაცია არ ჰქონდათ. ზაზა თამარაშვილი იმასაც აღნიშნავს, რომ ეს მერიის მიერ დაშვებული შეცდომა იყო.
ნანა მიქელაძის მსგავსად, დოკუმენტაცია, რომლის მიხედვითაც სტიპენდიის გაცემის ხარგრძლივობა განისაზღვრა, ,,მე–9 არხმაც“ გამოითხოვა, თუმცა თვითმმართველობისგან სრულყოფილი ინფორმაცია ვერ მიიღო. ახალციხის მერიამ მხოლოდ ის დოკუმენტები მოგვაწოდა, რომლის მიხედვით, სტიპენდიისთვის სტუდენტების შერჩევა მოხდა. ასევე გიორგი კოპაძის ბრძანება, ივნისსა და ივლისში ჩარიცხული სტიპენდიის შესახებ.
