სამცხე-ჯავახეთში ხიზაბავრის ტერასების აღდგენილ ტერიტორიაზე, უძველესი მესხური ვაზის ჯიშების გაშენება დაიწყო. თამარის ჯიშის პირველი ნერგი, საქართველოს პრემიერ–მინისტრმა, მთავრობის წევრებთან და მესხური ტერასების პროექტის დამფუძნებლებთან ერთად დარგო.
მესხეთის უძველესი ტერასების 12 ჰექტარი ფართობი უკვე აღდგენილია. რეაბილიტირებულ ტერასებზე 17 იშვიათი ჯიშის მესხური ვაზი ირგვება, რაც რეგიონში მევენახეობა-მეღვინეობის ისტორიულად მნიშვნელოვანი მიმართულების აღორძინებას ხელს შეუწყობს. მესხური ტერასები მთლიანობაში 23 ჰექტარ მიწის ფართობს მოიცავს. ჯამური ინვესტიციის მოცულობა ნახევარ მილიონ ლარამდეა. პროექტის ავტორები იმედოვნებენ, რომ სოფელ ხიზაბავრში გაშენებული ტერასები სამცხე-ჯავახეთის ტურისტული პოტენციალის გაზრდას შეუწყობს ხელს.
მესხური ტერასების პროექტის წარდგენის შემდეგ, პრემიერმა და მთავრობის წევრებმა, ვარძიასთან ახლოს მდებარე სოფელი ჭაჭკარი დაათვალიერეს, სადაც უნიკალური ისტორიული და კულტურული მემკვიდრეობის უძრავი ძეგლის რეაბილიტაციის პროექტის პრეზენტაცია გამართა. უძველესი სოფლის სარეაბილიტაციო სამუშაოები, სახელმწიფო და კერძო სექტორის – ,,თი ბი სი“ ბანკის ერთობლივი ინიციატივით განხორციელდება. კულტურული მემკვიდრეობის სააგენტოში, სამუშაო ჯგუფი უკვე შექმნილია. ამ ეტაპზე, ჭაჭკარის რეაბილიტაციის პროექტის კონცეფციაა მომზადებული.
კლდეში ნაკვეთი 50–მდე საწნახელი, მიწური, ბანიანი სახლები, წმინდა გიორგის სახელობის ეკლესია და ოთხსაუკუნოვანი ვაზი, რომელიც ყურძენს დღემდე ისხამს – ასეთია სოფელი ჭაჭკარი, რომელიც IX-XI საუკუნეების, პირვანდელი სახითაა შემორჩენილი.
სოფელი ჭაჭკარი, ვარძიის კომპლექსის გაგრძელებაა. იგი მტკვრის ორივე ნაპირზეა გაშენებული და უნიკალური ადგილმდებარეობით, კულტურული მემკვიდრეობის ობიექტების სიმრავლითა და ისტორიული მნიშვნელობით გამოირჩევა. ეს სოფელი, ვარძიის სამონასტრო კომპლექსამდე, ორი საუკუნით ადრეა გაშენებული.
