ვინ არის "აგენტი"? - ახალციხელები "უცხოეთის აგენტობის" კანონზე
13:26 / 22.02.2023
საპარლამენტო უმრავლესობის წევრების მიერ ინიციირებული კანონპროექტის, "უცხოური გავლენის აგენტების" შესახებ, ახალციხელებს ვკითხეთ და ვთხოვეთ განემარტათ ვინ არის აგენტი.
გამოკითხულთა უმრავლესობა მიიჩნევს, რომ აგენტი ქვეყნის მოღალატეა, ის ვინც ქვეყნის ინტერესების საწინააღმდეგოდ, ფარულად მუშაობს და არაფერი აქვს საერთო აღნიშნული კანონპროექტთან. მოქალაქეები ასევე ფიქრობენ, რომ უკეთესი მომავლისთვის ბრძოლა აგენტობა არ არის.
დოკუმენტის მიხედვით, "უცხოური გავლენის აგენტებად" მოიაზრებიან:
ყველა არასამეწარმეო (არაკომერციული) იურიდიული პირი, მათ შორის ყველა არასამთავრობო ორგანიზაცია, რომლის წლიური შემოსავლის 20 პროცენტზე მეტი "უცხოური ძალაა". თუმცა, არა - სახელმწიფო ორგანიზაციები ან საქართველოს კანონმდებლობით დაფუძნებული სპორტული ფედერაციები;
ტელევიზიები, რომელთა შემოსავლის 20 პროცენტზე მეტი "უცხოური ძალაა"(არ იგულისხმება რეკლამა);
მასობრივი ინფორმაციის საშუალებები, მათ შორის გაზეთები და ონლაინ მედიასაშუალებები, რომელთა შემოსავლის 20 პროცენტზე მეტი "უცხოური ძალაა"(არ იგულისხმება რეკლამა).
კანონპროექტი "უცხოური გავლენის აგენტის გამოსავლენად" იუსტიციის სამინისტროს უფლებამოსილებას ანიჭებს ჩაატაროს კვლევა. უცხოური გავლენის აგენტად რეგისტრაციისთვის თავის არიდებისთვის ან დეკლარაციის არშევსება გამოიწვევს ორგანიზაციის დაჯარიმებას 25 ათასი ლარის ოდენობით. პროექტით ასევე გათვალისწინებულია შემდეგი სახის ჯარიმები:
იუსტიციის სამინისტროს ვებ-გვერდზე დაშვებიდან 10 სამუშაო დღის ვადაში, თუ ორგანიზაცია არ შეავსებს განაცხადის ფორმას - 10 ათასი ლარი;
დოკუმენტებში ხარვეზების განსაზღვრულ ვადაში არგამოსწორების შემთხვევაში - 10 ათასი ლარი; კანონით გათვალისწინებული სამართალდარღვევის ერთი თვის შემდეგ ჩადენა - 20 ათასი ლარი.