აპოხტის ხინკალი მესხური სამზარეულოს ერთ-ერთი გამორჩეული კერძია, რომელიც მესხეთში უძველესი დროიდან მზადდება. აპოხტი გამომშრალი ხორცია, რომელსაც ცომში ათავსებენ და ხარშავენ.
გიზიარებთ აპოხტის ხინკლის რეცეპტს და მომზადების მასტერკლასს ზაზა ივანიძესთან ერთად.
ინგრედიენტები:
ცომი:
ფქვილი 1კგ.
კვერცხი 1ც.
მარილი გემოვნებით.
შიგთავსი:
აპოხტი 1კგ.
ნიორი და შავი პილპილი გემოვნებით.
მომზადების წესი:
წყალში ჩავყაროთ მარილი, დავამატოთ კვერცხი, ფქვილი და კარგად მოვზილოთ (ცომი უნდა მოვზილოთ მაგარი), ცომს ვყოფთ მომცრო გუნდებად, ვშლით ჩვეულებრივად ხინკლის ცომის სისქეზე და დანით ვჭრით ოთხკუთხედ ნაჭრებად, ისეთ ზომებად რომ პატარა, დაახლოებით პილმენების ხელა ხინკლები გამოვიდეს. ვდებთ აპოხტის რამდენიმე პატარა ნაჭერს და ვახვევთ, ისე რომ ღია დარჩეს პატარა ,,პირი''. მომზადებული ხინკლები მოვხარშოთ მარილიან წყალში. მოხარშული ხინკლები ამოვაწყოთ სასურველ ჭურჭელზე, მოხარშულს ზემოდან მოვასხათ კარაქში ან ერბოში მომწვარი ხახვი. (ამ ხინკალთან აუცილებლად მიაქვთ სუფრაზე ნიორწყალი, შავი პილპილი და კარგი არაყი).
შიგთავსის მომზადება: აპოხტი არის დამარილებული და გამომშრალი ხორცი, რომელსაც მესხეთის სოფლებში თითქმის ყველა ოჯახი ამზადებს ზამთარში. აპოხტი დავჭრათ წვრილ ნაჭრებად (დაახლოებით ქიშმიშის ზომებად), მოვაყაროთ დანაყილი ნიორი, შავი პილპილი და კარგად ავურიოთ.