სოფლის ამბები
„საქართველოს მოქალაქე ვარ, მაგრამ აქ ყოფნა არ მინდა“ - პეტროს მელქონიანი (ვიდეო)

ახალციხის სოფელ ნაოხრებს მოასფალტებული გზა ორ ნაწილად ჰყოფს. მოსახლეობა გზის მარჯვენა და მარცხენა მხარეს სახლობს. სოფელი ძირითადად, ეთნიკურად სომეხი თემით არის დასახლებული, თუმცა აქ ქართულ ოჯახებსაც შეხვდებით.

ისევე როგორც ახალციხის სხვა სოფლების, ნაოხრების მოსახლეობაც თავს კარტოფილის მოყვანით და რეალიზაციით ირჩენს. ადგილობრივები ამბობენ, რომ ყველაზე ხშირად მოხმარებადი ბოსტნეული ბოლო დროს, მათთვის წამგებიან საქმედ იქცა. სათესლე მასალას სამ ლარად ყიდულობენ, თესენ, უვლიან, მორწყვაში ფულს იხდიან, შემდეგ კი გაყიდვა უჭირთ ან იძულებულნი არიან, დაბალ ფასად გაყიდონ.

„მოსავალს 70 თეთრად ვყიდით. აქ ცხოვრება ძვირია, მეტს ვხარჯავთ. ყველაფერს ვყიდულობთ, მაგალითად წყალი 1 საათი 10 ლარი ღი“, - წუხს 92 წლის მარგარიტა მელქონიანი.

ამავე საკითხებზე ჩივის მარიტას თანასოფლელი, 55 წლის ვერონიკა ნაზარეტიანიც.

„კარტოფილის გასაყიდი ფასი არ გვაწყობს, სამუშაოც არ გვაქვს, რომ ვიმუშაოთ და ხელფასი გვქონდეს“, - ამბობს ვერონიკა ნაზარეტიანი.

ნაოხრებში ამბობენ, რომ წელს არც კარტოფილის მოსავალში გაუმართლათ. ზაფხულში სარწყავი წყლის არასაკმარისი დებეტის გამო, ნათესი გაუხმათ. ადგილობრივების თქმით, ეს პრობლემა სოფელს წლებია აწუხებს.

„თესლში ძვირს ვიხდით, რომ მოსავალი მივიღოთ, მაგრამ დათესილ ბოსტნეულს მორწყვაც სჭირდება. სოფელში სარწყავი წყალი არ გვაქვს“,- ყვება 49 წლის ქეროფ სუქასიანი.

ნაოხრებში, სოფლის მეურნეობის საქმეს ძირითადად, შუა და ხანშიშესული ადგილობრივები აკეთებენ. ახალგაზრდები სამუშაოდ რუსეთში წავიდნენ. ქვეყნის დატოვების მიზეზად, მოსახლეობა სამუშაო ადგილების არარსებობას ასახელებს. მარგარიტა მელქოიანი ამბობს, რომ ახალგაზრდები სახლებში მხოლოდ დღესასწაულებზე ბრუდებიან, ისიც მცირე ხნით.

რუსეთში ბევრი მიდის, აქ არავინ რჩება. დღესასწაულების დროს ჩამოდიან და უკან მალევე ბრუნდებიან“.

ოფიციალური მონაცემების მიხედვით, 2002 წელს სოფელში 748 კაცი ცხოვრობდა, 12 წლის შემდეგ, მოსახლეობის აღწერის მიხედვით, ადგილობრივების რაოდენობა 260 კაცით შემცირდა. დაახლოებით, 200-კომლიან სოფელს წელს მხოლოდ ერთი პირველკლასელი ჰყავს.

„სამუშაო არ არის. უმეტესობა აქედან  წასულია. ახალგაზრდები სულ რუსეთში არიან. სადაც შესაძლებელია ფულის შოვნა, იქ მიდიან. საქართველოში 2-3 თვით ბრუნდებიან,  მშობლები აქ ჰყავთ. საქართველოში რომ საქმე იყოს, აქედან არავინ წავა“, - ამბობს მანას პოღოსიანი.

55 წლის ვერონიკა ნაზარეტიანი პენსიას ხუთ წელში აიღებს, თუმცა მანამდე სამუშაოს ისევ უშედეგოდ ეძებს.

პენსიამდე რა უნდა ვქნა, არ ვიცი. აქ ვერ ცხოვრობენ, ახალგაზრდები ამიტომაც მიდიან. აქ უმეტესობა ასაკოვანია, თითქმის ყველა მეორე სახლი დაკეტილია“, -  წუხს ვერონიკა ნაზარეტიანი.


ახალგაზრდების მსგავსად, საქართველოს დატოვება და რუსეთში სამუშაოდ წასვლა უნდა პეტროს მელქოიანსაც. ამბობს, რომ ემიგრაციაში ყოფნა მისთვის შედარებით მარტივი იქნება, რადგან თანასოფლელები გვერდით ეყოლება და სამუშაოსაც ადვილად იპოვის.

ბევრი ხალხი მიდის. სამუშაო არ არის, აქ რატომ უნდა დარჩნენ? არც მე დავრჩები. საქართველოს პასპორტი მაქვს, მაგრამ აქ ყოფნა არ მინდა, ან ევროპაში, ან რუსეთში წავალ, მაგრამ რუსეთში ბევრი თანასოფლელი გვყავს“, - სამომავლო გეგმებზე გვესაუბრა ნაოხრების მკვიდრი პეტროს მელქოიანი.

სოფლად დარჩენილები ნაოხრებში თავშეყრის ადგილის მოწყობას ითხოვენ. იმისთვის, რომ დრო ერთად გაეტარებინათ, ხანშიშესულებმა საკუთარი სახსრებით, სოფლის შესასვლელში პატარა ჯიხური ააშენეს. ამბობენ, რომ ამ მოთხოვნით ადგილობრივ ხელისუფლებასაც არაერთხელ მიმართეს, თუმცა უშედეგოდ.

„ასაკოვან ხალხს დასაჯდომი ადგილი არ გვაქვს, რომ დრო ერთად გავატაროთ, ჭადრაკი ვითამაშოთ“, - ამბობს ქეროფ სუქასიანი.

ადგილობრივებისთვის ღამით სოფელში გადაადგილებაც პრობლემას წარმოადგენს. ნაოხრებში გარე განათება არ არის, მხოლოდ სამი ნათურა სოფლის შესასვლელში, ცენტრალური გზაზეა დამონტაჟებული.

„მამაჩემი 70-80 წლის კაცია, ღამე ვერ დადის, ფარანი ვუყიდე, რომ სახლამდე ასე მივიდეს. გვპირდებიან, რომ გააკეთებენ, მაგრამ არაფერი არ კეთდება“, - ამბობს ქეროფ სუქასიანი.ზამთრის მოახლოებასთან ერთად, ადგილობრივებს საზრუნავი ემატებათ. სოფელი გაზიფიცირებულია, თუმცა მოსახლეობის უმრავლესობა ისევ შეშით თბება. მიზეზად, მცირე ბიუჯეტს ასახელებენ. ბუნებრივი აირით გათბობისთვის თვეში საშუალოდ, 200 ლარი სჭირდებათ, ამ თანხაში კი ზამთრისთვის სამყოფი შეშის ნახევარს ყიდულობენ.

„გაზი ძვირია. ხელფასი არ გვაქვს. შეშა ერთი მანქანა 80 ლარი ღირს. ეს უფრო გვაწყობს, ამიტომაც შეშით ვთბებით“, - ყვება მანას პოღოსიანი.

გათბობასთან ერთად სოფელში სასმელი წყლის პრობლემაც დგას. მოსახლეობა ჩივის, რომ წყალს, რომელიც სოფელს მთიდან მიეწოდება, არასასიამოვნო სუნი აქვს და სასმელად უვარგისია.

„სასმელი წყალი არ გვაქვს, მთიდან მოდის და ისიც ცოტა. ბოთლში ცოტა ხნით რომ გააჩერო, საშინელი სუნი ასდის“, - ყვება ქეროფ სუქასიანი.

ახალციხის მუნიციპალიტეტის მერი თვლის, რომ ნაოხრებში სარწყავი წყლის პრობლემა არ დგას. ზაზა მელიქიძე ამბობს, რომ სოფელს არც განათების პრობლემა უნდა აწუხებდეს. რაც შეეხება თავშეყრის ადგილს - მუნიციპალიტეტის პირველი პირი ამბობს, რომ ინფრასტრუქტურული პროექტები ნელ-ნელა ხორციელდება.

Facebook Twitter
პარტნიორი მედიასაშუალებების მასალები
ამინდი
ახალციხე 14 °C
img
ახალქალაქი 12 °C
img
ასპინძა 13 °C
img
ადიგენი 18 °C
img
ბორჯომი 16 °C
img
თბილისი 21 °C
img
აბასთუმანი 11 °C
img
ბაკურიანი 11 °C
img
ნინოწმინდა 12 °C
img
ვალუტა
EUR
EUR
1
3.4626
RUB
RUB
100
4.4772
TRY
TRY
1
0.4572
USD
USD
1
3.1172
AMD
AMD
1000
6.4554
კალენდარი
«« ივნისი 2020 »»
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 12345
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენტის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს "საქართველოს ღია საზოგადოების ფონდის" პოზიციას. შესაბამისად, ფონდი არ არის პასუხისმგებელი მასალის შინაარსზე.