ახალციხის მერია უსახლკაროთათვის თავშესაფრის მშენებლობას იწყებს. 120 000 ლარად შეფასებული პროექტისათვის ტენდერში გამარჯვებული კომპანია გამოვლენილია. ცენტრალური საავადმყოფოს მიმდებარე ტერიტორიაზე, სადაც თავშესაფარი განთავსდება, მიწის ნაკვეთი უკვე მოსწორდა.
სონია კაშახჩიანი ზარზმელის ქუჩის #13–ში მარტო ცხოვრობს. ახალციხეში მას ნათესავები არ ჰყავს. ამბობს, რომ ბინა, სადაც ამ დრიოსათვის იმყოფება, მისი საკუთრება არ არის, სახელმწიფომ წლების წინ დროებით სარგებლობაში გადასცა, ამჟამად კი 2 ოთახზე პრეტენზიას მეზობელიც აცხადებს. 80 წლის მარტოხელა ქალბატონს საკუთარი დაკრძალვისთვის თანხა უკვე შეგროვებული აქვს. სასმელ წყალს მეზობლის ეზოდან ეზიდება, უფასო სასადილოში კი ყოველდღიური საკვების მისაღებად შორი გზის გავლა ფეხით უწევს. პენსიონერი ქალბატონი ამბობს, რომ თუკი სიმარტოვე აღარ შეაწუხებს და პირობებიც ექნება, ასაწყობ სახლებში იცხოვრებს, თუმცა შერჩეული ადგილი ქალაქისგან ძალიან მოშორებულია.
კიდევ ერთი ქალბატონი, რომლის ოჯახიც უსახლკაროდაა დარჩენილი, ვინაობის გამხელისაგან თავს იკავებს. ამბობს, რომ საცხოვრებელი შვილის ავადმყოფობის გამო გაყიდა და უკვე 7 წელია ოჯახი ახალციხეში ქირით ცხოვრობს. 68 წლის ქალბატონი ეჭვობს, რომ დროებით თავშესაფარში, სადაც მათი 5 სულიანი ოჯახისათვის სავარაუდოდ 1 ოთახი განისაზღვრება, საკმარისი არ იქნება და ცხოვრება კვლავ ნაქირავებ ბინაში მოუწევთ.
საცხოვრებელი, რომელიც ცენტრალური საავადმყოფოს მიმდებარე ტერიტორიაზე განთავსდება, 16 ოთახისგან შედგება. როგორც ახალციხის მერი განმარტავს, დროებითი საცხოვრებლით ის პირები ისარგებლებენ, რომლებსაც თავშესაფარი საერთოდ არ გააჩნიათ. რა პრინციპით შეირჩევა ბენეფიციარები – ჯერ–ჯერობით უცნობია.
სოციალურად დაუცველთათვის ასაწყობი შენობის კომპლექტის შეძენისა და დამონტაჟებისთვის ახალციხის მერიამ 120 000 ლარი გამოყო. აღნიშნულ პროექტზე გამოცხადებული ტენდერი შპს ,,კუშა 2011“–მა 118 ათას ლარად მოიგო. სატენდერო დოკუმენტაციის მიხედვით, სახლის აწყობის ვადა, რომლითაც 60–მდე ადამიანს შეეძლება სარგებლობა, სექტემბრის დასაწყისში იწურება.
