ახალციხის მუნიციპალიტეტის საკრებულოს №44 დადგენილების მიხედვით, ახალციხის მუნიციპალიტეტის საპატიო მოქალაქის წოდება შეიძლება მიენიჭოს საქართველოს მოქალაქეს, ასევე უცხო ქვეყნის მოქალაქესა და მოქალაქეობის არმქონე პირს, რომელსაც თავისი საზოგადოებრივი, პროფესიონალური, სამეცნიერო ან/და სხვა საქმიანობით აქვს:

ა) განსაკუთრებული დამსახურება ახალციხის მუნიციპალიტეტის ან/და საქართველოს წინაშე;

ბ) მნიშვნელოვანი წვლილი შეტანილი ახალციხის მუნიციპალიტეტის ან/და საქართველოს განვითარების საქმეში;

გ) მნიშვნელოვანი წვლილი შეტანილი ახალციხის მუნიციპალიტეტთან მეგობრული კავშირების განმტკიცებაში.

"ახალციხის მუნიციპალიტეტის საპატიო მოქალაქის წოდების მინიჭება იქნება ერთგვარი ხელშემწყობი ფაქტორი ღვაწლმოსილ პიროვნებათა დამსახურების აღიარებისა და მომავალი თაობების ღირსეულად აღზრდისათვის", – წერია საკრებულოს დადგენილებაში.

საპატიო მოქალაქის წოდების მისანიჭებლად კანდიდატურის წამოყენების უფლება აქვს:

ა) საზოგადოებრივ, პროფესიულ, შემოქმედებით კავშირებსა და ორგანიზაციებს;

ბ) მუნიციპალიტეტის მერს;

გ) საკრებულოს თავმჯდომარეს;

დ) საკრებულოს სიითი შემადგენლობის 1/3-ს;

ე) მოქალაქეთა საინიციატივო ჯგუფს, მუნიციპალიტეტის ამომრჩეველთა არანაკლებ 1%-ის ხელმოწერით;

უფლებამოსილ პირებს, განცხადების შეტანა 27 ივნისამდე შეუძლიათ.

საპატიო მოქალაქეს 13–კაციანი სამუშაო ჯგუფი, ხმათა უმრავლესობით შეარჩევს. მის შემადგენლობაში შედიან:

გელა ნოზაძე – საკრებულოს თავმჯდომარე; გიორგი კოპაძე – ახალციხე–ადიგენის მაჟორიტარი დეპუტატი; მეუფე თეოდორე – ახალციხისა და ტაო–კლარჯეთის მიტროპოლიტი; რუბენ კარაპეტიან – ახალციხის მერის მოადგილე; ზოია ბალიაშვილი – საკრებულოს წევრი "ქართული ოცნებიდან"; ამბარცუმ ბაბოიან – საკრებულოს წევრი "ქართული ოცნებიდან"; მაკა ბერიძე – სამცხე–ჯავახეთის სახელმწიფო უნივერსიტეტის რექტორი; ცირა მესხიშვილი – ასოციაცია "ტოლერანტის" თავმჯდომარე; ციური ლაფაჩი – მუზეუმის დირექტორი; ნანა ნათენაძე – სამხატვრო სკოლის დირექტორი; ვასილ კვინცხაძე, ომარ ჯაყელი, ნათელა იაძე.