2018 წლის 1ოქტომბრიდან დაიწყო დიდი მოცულობის ძრავის მქონე ავტომობილების (3.0 ძრავით და ზემოთ) ტექნიკური ინსპექტირების პროცესი.

ავტომანქანების ტექნიკური ინსპექტირება სავალდებული 2018 წლის 1 იანვრიდან გახდა და პირველ ეტაპზე დაიწყო სამგზავრო (8 ადგილის ზემოთ) და სატვირთო (3.5ტონის ზემოთ) ავტომობილებით.

- 2018 წლის 1 ივლისიდან ინსპექტირების გავლა დაევალათ სახელმწიფო უწყებებისა და იურიდიული პირების კუთვნილ ავტომანქანებს, ხოლო
- 2019 წლის 1 იანვრიდან 31 დეკემბრის ჩათვლით - ინსპექტირებას გაივლის საქართველოს დანარჩენი ავტოპარკი.

ავტომანქანის მფლობელმა უნდა ნახოს სარეგისტრაციო მოწმობაში მანქანის გამოშვებისა და რეგისტრაციის თარიღი. რეგისტრაციის თარიღი (თვე) არის მისი ავტომანქანისთვის ტექნიკური ინსპექტირების გავლის ბოლო ვადა. მაგალითად, თუ ავტომობილის რეგისტრაციის თარიღია 2009 წლის აგვისტო, მისთვის ტექნიკური ინსპექტირების ბოლო ვადა ტექდათვალიერების დაწყებიდან აგვისტომდე იქნება.

მფლობელს შეეძლება საკუთარი ავტომანქანა ქვეყნის ნებისმიერ რეგიონსა თუ ქალაქში შეამოწმებინოს.

ამასთან, მოქმედებს ცხელი ხაზი ნომრით - 1484. ასევე ვებ-გვერდი, რომლის საშუალებითაც პირს შეუძლია მისთვის სასურველ ტესტირების ცენტრში ვიზიტი დაგეგმოს.

საქართველოში იმოქმედებს საერთაშორისო პრაქტიკაში მიღებული წესი. კერძოდ, 4 წლამდე ავტომანქანებისთვის ინსპექტირება არ იქნება საჭირო, 4-დან 6 წლამდე ავტომანქანებისა - ორ წელიწადში ერთხელ, 6-დან 8 წლამდე - ორ წელიწადში ერთხელ, ხოლო 8 წლის ზემოთ ასაკის ავტომანქანებისთვის - ყოველწლიურად.

მსუბუქი ავტომობილების ტექნიკური ინსპექტირება 60 ლარი, ხოლო სატვირთო და სამგზავრო ავტომობილების - 100 ლარი ეღირება. თანხის გადახდა მხოლოდ უნაღდო ანგარიშსწორებით მოხდება.

პერიოდული ტექნიკური ინსპექტირების გავლისას ავტომობილმა 7 ძირითადი კრიტერიუმი უნდა დააკმაყოფილოს.

1. მუხრუჭები,
2. საჭის მართვის სისტემა,
3. ხილვადობა,
4. ფარები,
5. ღერძულა,
6. შასი და მისი შემადგენლები და
7. გამონაბოლქვი.

რაც შეეხება მავნე გამონაბოლქვს, ნებისმიერი ავტომობილისთვის, იმის მიუხედავად, აქვს თუ არა მას კატალიზატორი, იმოქმედებს გამონაბოლქვის მაქსიმალური დასაშვები ნორმა, რომელიც უნდა დააკმაყოფილოს გამართული წვის სისტემის მქონე ავტომობილმა.

თავდაპირველად, ყველა ავტომფლობელს, რომლის სატრანსპორტო საშუალებასაც აღმოაჩნდება ისეთი ხარვეზი, რაც ეწინააღმდეგება დადგენილ მოთხოვნებს, მიეცემა გონივრული ვადა (არაუმეტეს 1 თვე) პრობლემის მოსაგვარებლად.

ამასთან, გამკაცრდება ინსპექტირების მოწმობის არქონის შემთხვევაში არსებული საჯარიმო სანქციები. ფიზიკური პირისთვის ჯარიმა 10 ლარის ნაცვლად იქნება 50 ლარი, ხოლო იურიდიული პირებისთვის - 100 ლარის ნაცვლად 200 ლარი. 50-ლარიანი ჯარიმა დაეკისრება იმ მძღოლსაც, რომელიც მართავს სხვის ავტომობილს.

პერიოდული ტექნიკური ინსპექტირების დაწყების ეტაპიდან საჭის გადატანა აიკრძალება. რაც შეეხება უკვე საჭეგადატანილ ავტომობილებს, ასეთი ავტომობილებიც ისევე გაივლიან ტექნიკურ ინსპექტირებას, როგორც სხვა ნებისმიერი, თუ ისინი ტექნიკური რეგლამენტით გათვალისწინებულ პარამეტრებს დააკმაყოფილებენ. ამასთან, მარჯვენასაჭიან ავტომობილებს არავითარი დამატებითი სირთულეები არ შეექმნებათ. მათ მოუწევთ მხოლოდ მაშუქი ფარების დახრილობისა და სინათლის ნაკადის მიმართულების ცვლილება.