"დაძაბული და გაუგებრობებით სავსე წელი იყო" - ჯავახეთის საინფორმაციო ცენტრის რედაქტორი

მედია

28.12.2024

რამდენიმე დღეში 2025 წელი დადგება. სამცხე-ჯავახეთში ადგილობრივი მედიის წარმომადგენლები გავლილ 2024 წელს აფასებენ და ამბობენ, რომ დაძაბული და გაუგებრობებით სავსე წელი იყო.

მედიისთვის და არამხოლოდ მათთვის, დაძაბული წელი, ჯერ კიდევ 2024 წლის მარტიდან დაიწყო, როდესაც "ქართულმა ოცნებამ" ე.წ "რუსული კანონი" წინ წამოწია, "რომელსაც გამჭვირვალობის შესახებ" კანონი დაარქვა და პარლამენტმა მიიღო კიდეც. საზოგადოების აზრით, ხელისუფლებამ ამ გზით სცადა მედია, სამოქალაქო სექტორი და ყველა ის ორგანიზაცია, რომლის 20% უცხო ქვეყნიდან ფინანსდებოდა, გაეკონტროლებინა. შეიქმნა რეესტრი, სადაც მედია და არასამთავრობო სექტორი უცხო ძალის ინტერესების გამტარებელ ორგანიზაციებად უნდა დარეგისტრირებულიყვნენ, რაზეც უმრავლესობამ რეგისტრაციაზე უარი თქვა.

უცხო ძალის ინტერესების გამტარებელ ორგანიზაციად დარეგისტრირებაზე უარი თქვა ჯავახეთის საინფორმაციო ცენტრმაც. მთავარი რედაქტორის რიმა ღარიბიანის თქმით, მათთვის მთელი წელი მიღებული კანონის გამო დაძაბული და გაუგებარი შეიქმნა, რაც დღემდე გრძელდება.

,,საშინელი წელი იყო, ჩვენ აღმოვჩნდით გაუგებარ სიტუაციაში, სულ ვიცოდით რომ ხალხისთვის კარგ საქმეს ვაკეთებთ, ამ კანონით აღმოჩნდა, რომ ვითომ უცხო ძალების ინტერესებისთვის ვმუშაობდით. რა თქმა უნდა ვიცით, რომ ვმუშაობთ ხალხისთვის და ქვეყნის განვითარებისთვის. ასეც გავაგრძელებთ სანამ შეგვიძლია, მაგრამ ისიც უნდა აღინიშნოს, რომ ძალიან ძნელია ასეთ გაუგებრობასა და დაძაბულობაში მუშაობა"- ამბობს რიმა ღარიბიანი.

არსებული გაურკვევლობის მიუხედავად, რიმა ღარიბიანს იმედი აქვს, რომ ყველაფერი უკეთესობისკენ შეიცვლება და მომავალი წელი, 2024 -ზე ბევრად უკეთესი იქნება.