რა ცვლილებები ამოქმედდება 1-ელი აპრილიდან საქართველოში?

საზოგადოება

01.04.2025

დღეიდან, სახელმწიფო ცვლილებებისა და რეგულაციების ნაწილს აამოქმედებს. მათ შორის, სიგარეტის და პიროტექნიკის რეალიზაციის შეზღუდვებს, მსხვილფეხა რქოსანი პირუტყვის ექსპორტის შემთხვევაში, ყველა წონის დაშვებას და ა.შ.

გთავაზობთ ინფორმაციას იმის შესახებ, თუ რისი ამოქმედება მოხდება საქართველოში 2025 წლის 1-ელი აპრილიდან.

აპრილიდან საქართველოდან რამდენიმე ავიაკომპანიაც იწყებს ფრენებს სხვადასხვა მიმართულებით

საქართველოდან რამდენიმე ავიაკომპანიაც იწყებს ფრენებს. კერძოდ, 9 აპრილიდან იწყებს საქართველოდან პირდაპირ ფრენებს პარიზი-თბილისი-პარიზის მიმართულებით ფრანგული ავიაკომპანია Transavia France. 12 აპრილიდან შემოდის ბაზარზე შვეიცარიული Edelweiss-ი. 1-ლი აპრილიდან რეგულარულ რეისებს განახორციელებს easyJet UK ლონდონი-თბილისი-ლონდონის საჰაერო ხაზზე; ასევე 1-ლი აპრილიდან კვირაში 2 სიხშირით დაიწყებს ფრენებს easyJet Europe Airline GmbH მილანი-თბილისი-მილანის საჰაერო ხაზზე. ამასთან, 29 აპრილიდან აღდგენა ფრენები ქუთაისი-მადრიდის მიმართულებითაც. ცნობისთვის, ამ მიმართულებაზე რეისები „ვიზეარმა“ 2024 წლის მარტიდან გააუქმა.

2025 წლის 1 აპრილიდან, საქართველოში სიგარეტი მხოლოდ სადა შეფუთვით გაიყიდება

1-ელი აპრილიდან ნებისმიერი სიგარეტის შეფუთვა უნდა იყოს ერთნაირი. თამბაქოს ნაწარმის სტანდარტიზებული შეფუთვის გარეშე რეალიზაცია, თამბაქოს ნაწარმისა და მისი შეფუთვის სტანდარტიზების წესის დარღვევა 5 000 ლარის ოდენობით დაჯარიმდება.

2025 წლის 1-ელი აპრილიდან პიროტექნიკის გამოყენების წესების დარღვევაზე ჯარიმები ამოქმედდება

1-ელი აპრილიდან ამოქმედდება ჯარიმები პიროტექნიკური ნაწარმის გამოყენების წესების დარღვევაზე. უფრო კონკრეტულად, პიროტექნიკური ნაწარმის იმ პირისთვის მიყიდვა, რომელსაც, არ აქვს მისი ფლობის ან/და გამოყენების უფლება, გამოიწვევს პირის დაჯარიმებას 2 000 ლარის ოდენობით. ამასთან, პიროტექნიკური ნაწარმის შეძენა იმ პირის მიერ, რომელსაც არ აქვს უფლება გამოიწვევს ამ პირის 1000 ლარით დაჯარიმებას. გარდა ამისა, პიროტექნიკური ნაწარმის საქართველოს კანონმდებლობით დადგენილი წესების დარღვევით გამოყენება – გამოიწვევს პირის დაჯარიმებას 2 000 ლარის ოდენობით.

პროევროპულ აქციებზე, დემონსტრანტების მიერ პიროტექნიკის გამოყენების საპასუხოდ "ქართულმა ოცნებამ" წინასაახალწლოდ ჯერ ის მაღაზიები დალუქა, რომლებიც პროდუქტს ყიდდნენ, ხოლო შემდეგ ახალი რეგულაციები შემოიღო. დარეგულირდა პიროტექნიკის გამოყენება მანიფესტაციის დროს. მიმდინარე წლის 1-ელი თებერვლიდან კი პიროტექნიკის იმპორტის/ექსპორტის და რეალიზაციის მიმართულებით ამოქმედდა ახალი რეგულაცია, რაც გულისხმობს, რომ ეს ყველაფერი მხოლოდ სპეციალური ნებართვა/ლიცენზიის საფუძველზე იქნება დასაშვები.

2025 წლის 1-ელი აპრილიდან არასრულწლოვნის მიერ „112“-ის არამიზნობრივ გამოყენებაზე ჯარიმა ამოქმედდება

2025 წლის 1-ელი აპრილიდან მშობლის ან ბავშვის სხვა კანონიერი წარმომადგენლის მიერ არასრულწლოვნის აღზრდისა და სწავლების მოვალეობათა შეუსრულებლობაზე ადმინისტრაციული პასუხისმგებლობა ამოქმედდება. მათ შორის ჯარიმა იქნება გამოყენებული, არასრულწლოვნის მიერ „112“-ს არამიზნობრივ გამოყენებაზეც. ჯარიმა 100 ლარიდან 300 ლარამდეა.

2025 წლის 1-ელი აპრილიდან საჯარო სამსახურის ბიუროს ლიკვიდაცია მოხდება

საჯარო სამსახურის ბიუროს ლიკვიდაცია 2025 წლის 1-ელი აპრილიდან განხორციელდება. ცნობისთვის, პარლამენტმა საჯარო სამსახურის ბიუროს ლიკვიდაციის ინიციატივას მხარი 20 თებერვალს დაუჭირა. ლიკვიდაციის შემდეგ, ბიუროს ფუნქციები და უფლებამოსილებები მთავრობის ადმინისტრაციას გადაეცემა.

"ოცნება" გადაწყვეტილების მიზეზად ხარჯების ოპტიმიზაციას და მართვის რაციონალიზაციას ასახელებს, თუმცა თავად საჯარო სამსახურის ბიუროს თანამშრომლების ნაწილი აცხადებს, რომ ბიუროს გაუქმების მიზანია საჯარო სამსახურის წმენდა და კრიტიკული აზრის ჩახშობა.

2025 წლის 1-ელი აპრილიდან ხბოების ექსპორტი კვლავ დაშვებული იქნება

დღეიდან, 1 აპრილიდან ნებისმიერი წონის საქონლის ექსპორტი ისევ დაშვებული იქნება.

"თავისუფლების ინსტიტუტმა" და ქვემო ქვალონელმა გლეხებმა საკონსტიტუციო სასამართლო 2024 წლის დეკემბერში მოიგეს.

საქმე ის არის, რომ 2019 წლის დასაწყისიდან, საქართველოდან 140 კილოგრამამდე, მოზარდი მსხვილფეხა საქონლის ექსპორტი აიკრძალა. შემდგომში, რეგულაცია უფრო დამძიმდა და წონა 160 კგ-მდე გაიზარდა. მაშინ აკრძალვის მიზეზად სოფლის მეურნეობის სამინისტროში ასახელებდნენ, რომ "ხბოს ასაკში ნაკლები პირუტყვი გავა, განვითარდება უშუალოდ საქონლის ბაზა, განვითარდება ადგილზე ხორცის წარმოება".

თეგები: ცვლილებები /

Հեղինակ:

Tv9news

Երկ.

Երեք.

Չոր.

Հինգ.

Ուրբ.

Շաբ.

Կիր.