«Ավելի քան 100 միլիոն եվրո կսառեցվի, և դրա փոխարեն, որ այն ուղղվեր իշխանություններին, կտրամադրվի քաղաքացիական հասարակության կազմակերպություններին», - այս մասին հայտարարեց ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ջոզեֆ Բորելը, լրագրողների հետ զրույցում, Եվրամիության արտաքին գործերի խորհրդի նիստի մեկնարկից առաջ՝ Վրաստանի վերաբերյալ հարցի քննարկման համատեքստում։

Նրա խոսքով՝ նա նիստի ընթացքում խորհուրդ կտա դադարեցնել ծրագրերի զգալի մասի աջակցությունը, սակայն Եվրամիությունը կշարունակի աջակցել վրացի ժողովրդի արդար ընտրությունների համար մղվող պայքարին։

«Հստակ է, որ Վրաստանի հարցը այն թեման է, որը բոլորը քննարկում են։ Պետք է կայացվեն կոնկրետ որոշումներ։ Իմ առաջարկությունն այն է, որ դադարեցվի ծրագրերի զգալի մասի աջակցությունը, որոնք ուղղվում են իշխանություններին։ Ավելի քան 100 միլիոն եվրո կսառեցվի, և դրա փոխարեն այն կտրամադրվի քաղաքացիական հասարակության կազմակերպություններին։ Այսինքն՝ մենք կվերցնենք այս գումարը՝ 100 միլիոնից ավելի, և կտրամադրենք քաղաքացիական հասարակության կազմակերպություններին՝ արդար ընտրությունների համար նրանց պայքարը աջակցելու նպատակով։ Եվրամիությունը կշարունակի աջակցել վրացի ժողովրդին։

Միացման գործընթացը կասեցված է այնքան ժամանակ, մինչև Վրաստանի իշխանությունները չվերադառնան իրենց սկզբնական ուղուն։ Սկզբնական ուղուն վերադառնալու համար բազմաթիվ փոփոխություններ են անհրաժեշտ, և այս ընթացքում գումարը, որը մինչ այժմ ուղղվում էր իշխանություններին, այժմ մենք կօգտագործենք այն մարդկանց համար, ովքեր պայքարում են իրենց ապագայի համար», - հայտարարել է Բորելը։