ԱՄՆ-ի նախագահ Դոնալդ Թրամփի վարչակազմը սահմանում է լրացուցիչ սահմանափակումներ Ռուսաստանի նավթային, գազային և բանկային ոլորտների նկատմամբ՝ սահմանափակելով Ռուսաստանի հասանելիությունը ԱՄՆ-ի վճարային համակարգերին, հայտնում է CBS News-ը՝ հղում անելով չորս տեղեկատվական աղբյուրի։

Պարբերականը նշում է, որ ԱՄՆ ֆինանսների նախարարությունը չորեքշաբթի չեղարկել է նախկին նախագահ Ջո Բայդենի վարչակազմի կողմից հունվարին սահմանված 60-օրյա բացառությունը, որը թույլ էր տալիս որոշ ֆինանսական գործարքներ պատժամիջոցների տակ գտնվող ռուսական բանկերի մասնակցությամբ։ Այս քայլի արդյունքում այդ բանկերը այլևս չեն կարող օգտվել ԱՄՆ-ի վճարային համակարգերից՝ էներգետիկայի հետ կապված գործարքներ իրականացնելու համար։

Ռուսական ֆինանսական հաստատությունները, որոնք նախկինում ազատված էին պատժամիջոցներից, ներառում էին՝

• «Վնեշէկոնոմբանկ»,
• «Ֆինանսական կորպորացիա Օտկրիտիե»,
• «Սովկոմբանկ»,
• «Սբերբանկ»,
• «ՎՏԲ բանկ»,
• «Ալֆա-Բանկ»,
• «Ռոսբանկ»,
• «Բանկ Զենիթ»,
• «Բանկ Սանկտ-Պետերբուրգ»,
• Ռուսաստանի Կենտրոնական բանկը։

CBS News-ը նշում է, որ ամերիկյան բանկային համակարգերի հասանելիության հետագա սահմանափակումը բարդացնում է այլ երկրների համար ռուսական նավթի ձեռքբերումը, ինչը կրճատում է դրա գլոբալ առաջարկը։ Սա կարող է հանգեցնել նավթի գնի աճի մինչև 5 դոլարով մեկ բարելի համար, ինչը զգալի թռիչք է վերջին շաբաթների ցածր գների ֆոնին։

CBS News-ը շեշտում է, որ սահմանափակումների խստացումը տեղի է ունենում այն ժամանակ, երբ Թրամփի վարչակազմը փորձում է համոզել Ռուսաստանին ընդունել Ուկրաինայում պատերազմի ավարտի նպատակով առաջարկվող 30-օրյա հրադադարի պայմանները։