ՌԴ Պետդումայի պատգամավորները խնդրել են գյուղատնտեսության նախարարությանը՝ մարտին գների նվազման պատճառով չեղարկել արևածաղկի սերմերի արտահանման հարկը։ Տեղեկությունը տարածում է RBC գործակալությունը։

Գործակալության տվյալներով՝ գների նվազման համար ֆերմերները մեղադրում են արևածաղկի ձեթ վերամշակող ձեռնարկություններին, թեև  բուսական յուղի արտահանման գները նույնպես կտրուկ նվազել են։

Փոխվարչապետ Վիկտորիա Աբրամչենկոն խնդրել է գյուղատնտեսության նախարարությանը մշակել պատգամավորների առաջարկ արևածաղկի սերմերի արտահանման հարկի ժամանակավոր չեղարկման վերաբերյալ։ Մարտի 22-ին նման խնդրանքով փոխվարչապետին է դիմել Պետդումայի ագրարային հարցերով հանձնաժողովը, իսկ Աբրամչենկոյի գրասենյակը նամակը փոխանցել է գյուղատնտեսության նախարարությանը և համապատասխան այլ գերատեսչությունների՝ քննարկման համար։

Պատգամավորները պահանջում են խթանել արևածաղկի արտահանումը, քանի որ արտադրողները ապրանքի իրացման հետ կապված խնդիրներ են ունեցել։ Մասնավորապես, մարտի սկզբից այս բերքի մթերման միջին գինը նվազել է 25%-ով և կազմել 22 100 ռուբլի (284 դոլար) մեկ տոննայի դիմաց, ինչը 37%-ով պակաս է մեկ տարի առաջվա նույն ժամանակահատվածի համեմատ։

Պատգամավորները մտավախություն ունեն, որ գալիք սեզոնին ֆերմերները կկրճատեն ձիթապտղի մշակումը, և երկրում արևածաղկի անբավարար բերք է սպասվում, հատկապես, որ նախորդ տարվա բերքի մեկ երրորդը դեռ չի իրացվել։ Այսպես, Պետդումայի ագրարային հարցերի հանձնաժողովը պահանջում է մի քանի ամսով՝ մինչեւ այս տարվա հուլիսի 31-ը չեղարկել նախորդ տարվա արեւածաղկի սերմերի արտահանման հարկը։