«Վիվամեդ» կլինիկայի կլինիկական տնօրեն Զուրաբ Չխաիձեն ասում է, որ, ամենայն հավանականությամբ, այսօր և վաղը Մզիա Ամաղլոբելին կմնա իրենց կլինիկայում լրացուցիչ հետազոտությունների անցկացման նպատակով։ Այս մասին բժիշկն ասել է «TV Pirveli»-ին և հավելել, որ երկարատև սովը իր հետքն է թողնում օրգանիզմի վրա, իրավիճակը տագնապալի է, և միշտ հնարավոր են որոշակի բարդություններ։

«Հենց նոր այցելեցի Մզիա Ամաղլոբելիին, նա կայուն վիճակում է։ Անհրաժեշտ էր շարունակել լրացուցիչ հետազոտությունները և բժշկական խորհրդատվությունը։ Նա հաշվի է առնում մեր առաջարկությունները։ Նա արդեն ստացել է անհրաժեշտ նշանակումները, որոնք կատարվում են, և որոնց նա համաձայնել է, ինչը մեզ շատ է ուրախացնում։

Հետազոտությունները հիմնականում կապված են սովի ազդեցության հետ, ինչը ազդում է մարդու օրգանիզմի, մասնավորապես՝ ստամոքսաղիքային տրակտի վրա։ Այսօր նա կմնա մեզ մոտ, և, ամենայն հավանականությամբ, նաև վաղը, որպեսզի հետազոտությունները շարունակվեն և նրա վիճակը գտնվի վերահսկողության տակ։ Երկարատև սովի ազդեցությունը օրգանիզմի վրա ակնհայտ է։

Իհարկե, տագնապալի վիճակ է, և միշտ կարող են որոշակի բարդություններ առաջանալ։ Սովի ազդեցությունը օրգանիզմի վրա լուրջ հետևանքներ ունի»,- ասել է Չխաիձեն «TV Pirveli»-ի հետ հեռախոսազրույցում։

Մեդիամենեջեր Մզիա Ամաղլոբելին բանտում արդեն 26 օր է, ինչ սոված է մնում։ Նրան հետազոտությունների անցկացման նպատակով տեղափոխել են կլինիկա փետրվարի 4-ին։ Նրա դիրքորոշումն այն է, որ հետազոտությունների ավարտից հետո ցանկանում է վերադառնալ բանտ։