კრიტიკული ტელევიზიები უსამართლოდ დაჯარიმდნენ - TI

მედია

20.09.2024

წინასაარჩევნო პერიოდში კომუნიკაციების კომისიამ და სასამართლომ კრიტიკული ტელევიზიები უსამართლოდ დააჯარიმა, - ამის შესახებ ინფორმაციას „საერთაშორისო გამჭვირვალობა - საქართველო“ ავრცელებს.

უფრო კონკრეტულად, ორგანიზაციის განმარტებით, მიმდინარე წლის სექტემბრის დასაწყისიდან „ქართულმა ოცნებამ“ ეროვნულ მაუწყებლებში განათავსა წინასაარჩევნო რეკლამა, რომელშიც „საერთაშორისო გამჭვირვალობის“ შეფასებით, არაეთიკურ, არაკეთილსინდისიერ და შეცდომაში შემყვან კონტექსტში არიან ასახული არასამთავრობო ორგანიზაციების, მათ შორის, 2024 წლის საპარლამენტო არჩევნების სადამკვირვებლო ორგანიზაციების წარმომადგენლები. კანონის მოთხოვნებისადმი შეუსაბამობის საფუძვლით, ტელეკომპანია „მთავარმა“ უარი თქვა რეკლამის სამაუწყებლო ბადეში განთავსებაზე, ხოლო „ტვ პირველმა“ და „ფორმულამ“ მალევე ამოიღეს ის ეთერიდან. ამის გამო კომუნიკაციის კომისიამ და მოგვიანებით სასამართლომ თითოეული ტელეკომპანია 5000 ათასი ლარით დააჯარიმა.

გარდა ამისა, ტელეკომპანიების ინფორმაციით, მიუხედავად იმისა, რომ ტელეკომპანიებმა სასამართლოს დადგენილება სააპელაციო სასამართლოში გაასაჩივრა, 19 სექტემბერს კომუნიკაციების კომისიამ განმეორებით იმსჯელა ამ საკითხზე და ტელეკომპანიებს კიდევ ერთი სამართალდარღვევის ოქმი შეუდგინა. სავარაუდოდ, სასამართლო თითოეულ ტელეკომპანიას დამატებით არანაკლებ 10 000 ლარით დააჯარიმებს.

"სარეკლამო ვიდეორგოლში ფრაზის „უთხარი არა საზოგადოების მორალურ გადაგვარებას“ ფონზე ჩნდება არასამთავრობო ორგანიზაციების წარმომადგენლების და სხვა პირების ფოტოებისგან შემდგარი კოლაჟი. ვიდეორგოლი მასში ასახულ ადამიანებს აქცევს სიძულვილის ჯგუფების სამიზნედ და აქეზებს მათ მიმართ ძალადობას, რაც საფრთხეს უქმნის მათ პირად უსაფრთხოებას, რის გამოვლინებასაც არაერთხელ ჰქონია ადგილი ადრეც, მათ შორის, ახლო წარსულში. მიგვაჩნია, რომ ამ ორგანიზაციების წარმომადგენლების ქართული ოცნების საარჩევნო ვიდეოში გამოყენება მიზნად ისახავს ადგილობრივი სადამკვირვებლო ორგანიზაციების წინააღმდეგ მმართველი პარტიის მიერ კოორდინირებული და დაგეგმილი კამპანიის გაგრძელებას და სადამკვირვებლო ორგანიზაციების რეპუტაციის შელახვას. ხოლო, კომუნიკაციების კომისიისა და სასამართლოს გადაწყვეტილებები ფინანსურ დარტყმას აყენებს კრიტიკულ მედიას“-ნათქვამია ინფორმაციაში.

როგორც ორგანიზაციაში აცხადებენ, „საერთაშორისო გამჭვირვალობა - საქართველომ“ და „საქართველოს ევროპულმა ორბიტამ” საჩივრებით მიმართეს კომუნიკაციების ეროვნულ კომისიას „ქართული ოცნების“ მიერ განთავსებული რეკლამების არსებული სახით სამაუწყებლო ბადიდან მოხსნის მოთხოვნით. „საქართველოს ევროპულმა ორბიტამ” ასევე მიმართა ცენტრალურ საარჩევნო კომისიასაც.