Ախալցիխեում քաղաքային տրանսպորտում առանց տոմսի ուղևորի համար սահմանվել է 20 լարի տուգանք։ Համապատասխան որոշումն ընդունել է Ախալցիխեի սակրեբուլոն՝ հաստատելով վարչական իրավախախտման արձանագրության (տուգանքի կտրոնի) ձևը, լրացման, հանձնման և ներկայացման կարգը։

Ախալցիխեի սակրեբուլոյի նիստն անցկացվել է մարտի 27-ին, որին, բացի սակրեբուլոյի անդամներից, մասնակցել են քաղաքապետը և նրա տեղակալները։ Նիստում քննարկվել և ընդունվել է վեց հարց, որոնց թվում էր նաև «Ախալցիխեի գերեզմանատների կառավարման կենտրոն» իրավաբանական անձի տնօրեն Գիորգի Բերոշվիլու 2024 թվականի հաշվետվությունը։

Քննարկված հարցերից մեկն էլ Ախալցիխեի արհեստական լճի տարածքում գտնվող ոչ գյուղատնտեսական նշանակության հողամասի և դրա վրա կառուցված զուգարանի հանձնման մասին էր, որը փոխանցվել է «Ախալցիխեի մունիցիպալիտետի ջրամատակարարման և ջրահեռացման» իրավաբանական անձին։

Նիստի ընթացքում ընդդիմադիր պատգամավոր Նատո Դարբաիձեն քաղաքապետ Իրակլի Լազարաշվիլուն հարցեր ուղղեց քաղաքում իրականացվող ենթակառուցվածքային նախագծերի վերաբերյալ։

«Կարո՞ղ եք նշել գոնե մեկ նախագիծ, որով կարող եք հպարտանալ։ Մունիցիպալիտետում բազմաթիվ նախագծեր կան, որոնք տարիներով չեն ավարտվում, օրինակ՝ սպորտային դպրոցի շինարարությունը կամ Ռաբաթի կամուրջը։ Քանի՞ զատիկ պետք է դիմավորեն ախալցխացիները առանց այդ կամուրջի»․ ասաց Նատո Դարբայիձեն։

Ի պատասխան՝ քաղաքապետ Իրակլի Լազարաշվիլին նշեց, որ չավարտված նախագծերի պատճառը անբարեխիղճ ընկերություններն են, որոնք իրենց աշխատանքը պատշաճ չեն կատարում։

«Ինչ վերաբերում է Ռաբաթի կամուրջին, առավոտյան ես այնտեղ էի և հետևում էի շինարարական աշխատանքներին։ Զատկի տոներին կամուրջի հիմնական աշխատանքներն ավարտված կլինեն»,- հայտարարեց Ախալցիխեի քաղաքապետը։