Մոսկվան հարձակման է ենթարկվել անօդաչու թռչող սարքերով, հայտարարել է Մոսկվայի քաղաքապետ Սերգեյ Սոբյանինը։

Սոբյանինի խոսքով՝ միջադեպը տեղի է ունեցել Մոսկվայի ժամանակով ժամը 04։00-ի սահմաններում։ Նրա խոսքով՝ շենքերը լուրջ վնասներ չեն կրել, տուժածներ չկան։

Ռուսական պետական ​​լրատվական գործակալությունների փոխանցմամբ՝ անօդաչու թռչող սարքի բեկորները հայտնաբերվել են պաշտպանության նախարարության շենքից 2 կիլոմետր հեռավորության վրա։

«Այսօր՝ առավոտյան ժամը 04:00-ի սահմաններում, անօդաչու թռչող սարքի հարված է հասցվել երկու ոչ բնակելի շենքերի։ Լուրջ վիրավորներ և զոհեր չկան։ Բոլոր օպերատիվ ծառայություններն աշխատում են տեղում»,- գրել է Մոսկվայի քաղաքապետը։

Արտակարգ իրավիճակների ծառայության տվյալներով՝ մեկ անօդաչու թռչող սարքը խոցվել է Կոմսոմոլսկի պողոտայում, իսկ մյուսը հարվածել է Լիխաչևի պողոտայի վարչական շենքին։

Ռուսաստանի պաշտպանության նախարարությունը հայտարարել է, որ անհաջող հարձակում է իրականացվել անօդաչու թռչող սարքերով։ Ռուսաստանի պաշտպանության նախարարությունը տեղի ունեցածն անվանել է «ահաբեկչական հարձակում»։

«Հուլիսի 24-ի առավոտյան Կիեւի ռեժիմը երկու անօդաչու թռչող սարքերով ահաբեկչության փորձ է կատարել Մոսկվայի օբյեկտների վրա։ «Ուկրաինական երկու անօդաչու թռչող սարքերն էլ ճնշվել և խփվել են էլեկտրոնային պատերազմի միջոցով»,- հայտնել են նախարարությունից։