Վերջին երկու շաբաթում գրիպի տարածման ցուցանիշը կրկնապատկվել է, գերակշռում է հայտնի «խոզի գրիպը»։ Շատ երեխաներ հոսպիտալացված են Իաշվիլիի անվան կլինիկայում թոքաբորբով, նաև աճել է հոսպիտալացման մակարդակը, - այս մասին հայտարարել է Իաշվիլիի անվան մանկական կենտրոնական հիվանդանոցի բժշկական տնօրեն Իվանե Չխաիձեն։

Ինչպես նա նշեց, այսօր Վրաստանում գրիպի հաստատված դեպքերը կազմում են 25%-ը։

«Վրաստանում գրիպի դեպքերը գրանցվել են 44-րդ շաբաթից, սակայն կարևոր է, որ վերջին 3 շաբաթում ցուցանիշները աճող գծով են։ Կան սպասումներ, որ այս աճը կշարունակվի հաջորդ շաբաթների ընթացքում, իսկ հունվարին կունենանք գագաթնակետ։ Պիկի սպասումը դեկտեմբեր-հունվարի շրջանում է։

Վերջին 2 շաբաթում՝ 49-րդ շաբաթին, գրիպի հաստատված դեպքերի ցուցանիշը 12% էր, իսկ 50-րդ շաբաթին՝ 2 անգամ ավելի։ Այսօր Վրաստանում գրիպի դեպքերի քանակը կազմում է 25%։ Ներկայումս գերակշռող է H1N1՝ «խոզի գրիպը»։ Եթե նախորդ շաբաթներին գերակշռում էր A տեսակի վիրուսը, այժմ ի հայտ է եկել B տեսակի վիրուսը, որը կազմում է 2%։

Առավել տարածվածը շարունակում է մնալ H1N1 վիրուսը։ Վերջին 2 շաբաթում գրիպի ցուցանիշները կրկնապատկվել են, ինչին մասամբ նպաստել է նաև եղանակի փոփոխությունը։ Ակնկալում ենք, որ 51-րդ շաբաթը կլինի ավելի ակտիվ»,- նշել է Չխաիձեն։