«Մեզ մոտ կրկնապատկվել է այն հիվանդների թիվը, որոնք հոսպիտալացվում են սուր շնչառական հիվանդությունների նշաններով։ Եթե դիտարկենք մանկաբուժական հիվանդանոցները, զգալիորեն աճել է այն երեխաների հոսքը, ովքեր ունեն բարձր ջերմություն, հազ և կոկորդի ցավ», – ասել է Իաշվիլիի անվան կենտրոնական մանկական հիվանդանոցի բժշկական տնօրեն, Թբիլիսիի պետական բժշկական համալսարանի պրոֆեսոր Իվանե Չխաիձեն։

Նրա խոսքով՝ Վրաստանում շրջանառվող վիրուսների թվում ամենակարևորը և վտանգավորը գրիպի վիրուսն է։

«Այսօր Վրաստանում շրջանառում է 10-ից ավելի տարբեր տեսակի վիրուս։ Դրանցից ամենածանրն ու բարդություններով ընթացողը գրիպն է։ Հիվանդությունների վերահսկման ազգային կենտրոնի տվյալներով՝ գրիպի դեպքերի թիվն ամեն շաբաթ ավելանում է։ Գործնականում գրեթե յուրաքանչյուր երկրորդ գրիպանման հիվանդության հետևում կանգնած է գրիպի վիրուսը։

Գրիպի վիրուսներից ամենատարածվածն է H1N1-ը, այսպես կոչված խոզի գրիպը։ Հաճախ հանդիպում է նաև B տեսակի վիրուսը, իսկ H3-ի դեպքերն ավելի քիչ են։ Չորսկոմպոնենտային պատվաստանյութ ստացածները պաշտպանված են, քանի որ պատվաստանյութը համապատասխանում է երկրում շրջանառվող վիրուսներին։ Այդ պատվաստանյութը բարձր արդյունավետություն է ցուցաբերում ինչպես կանխարգելման, այնպես էլ բարդություններից խուսափելու համար։

Ինչ վերաբերում է կլինիկական հատվածին, ապա գրիպի դեպքերի աճը ներառում է ավելի ծանր ընթացող հիվանդություններ, որոնք հաճախ հոսպիտալացման կարիք են ունենում։ Իաշվիլիի կլինիկայում կրկնապատկվել է այն հիվանդների թիվը, որոնք հոսպիտալացվել են սուր շնչառական հիվանդություններով։ Նրանցից 40%-ը ունի թոքաբորբ, ինչը վկայում է, որ գրիպի վիրուսն այդ դեպքերի հիմնական պատճառներից մեկն է։

Բացի պատվաստանյութերից, գոյություն ունի նաև «օզելտամիվիր» հակավիրուսային դեղամիջոցը, որը կարող է կիրառվել գրիպի բարդությունների կանխարգելման համար։ Կարևոր է, որ այս դեղամիջոցը հնարավորինս շուտ սկսեն օգտագործել բարձր ռիսկի խմբերում», – նշել է Չխաիձեն։

Նա նաև ընդգծել է, որ բարձր ռիսկի խմբերի ներկայացուցիչները պետք է ստանան գրիպի պատվաստանյութ և գտնվեն բժիշկների հսկողության տակ։ Մյուս դեպքերում նպատակահարմար է ցուցաբերել սիմպտոմատիկ բուժում՝ կենտրոնանալով բարձր ջերմության և ցավերի ժամանակ համապատասխան դեղերի վրա, խուսափելով հակաբիոտիկներից, որոնք գրիպի դեմ արդյունավետ չեն։