ქალაქ ახალციხის 2017 წლის ბიუჯეტის პროექტზე, ადგილობრივი ხელისუფლება მუშაობას აგრძელებს. მთავარი ფინანსური დოკუმენტი წარმომადგენლობით ორგანოში უკვე განიხილეს და რეკომენდაციებთან ერთად, საკრებულოდან მერიაში დააბრუნეს.
ცენტრალური სტადიონის კეთილმოწყობა, სამხატვრო და სამუსიკო სკოლების, კულტურის სახლისა და სპორტსკოლის შენობის რეაბილიტაცია, პარკირების ადგილების მოწყობა, ქალაქის სკვერებისა და საპირფარეშოების მოწესრიგება, ტურისტული ღონისძიებების მოწყობა, შშმ პირებისთვის ადაპტირებული გარემოს შექმნა – ამ და სხვა პრიორიტეტების ბიუჯეტში ასახვა სურთ დეპუტატებსაც.
ბიუჯეტის პროექტში ცვლილებები შევა, თუმცა რომელ რეკომენდაციას გაითვალისწინებს და ჩაასწორებს აღმასრულებელი ხელისუფლება – ამაზე ახალციხის მერიაში ჯერ ვერ საუბრობენ. ქალაქის პირველი პირი ამბობს, რომ ბიუჯეტის თანხა შემცირებულია და ამ დანაკლისის შესავსებად, ვლადიმერ ზედგინიძე პროექტებისთვის თანხების მოძიებას აპირებს.
შენიშვნები და რეკომენდაციები აქვს ოპოზიციას. შალვა გოგოლაძემ, ბიუჯეტის პროექტში სამი სოციალური საკითხის გათვალისწინება ითხოვა. ,,ერთიანი ნაციონალური მოძრაობის” წევრის თქმით, მთავარი პრობლემაა ის, რომ ქალაქის ბიუჯეტი დაახლოებით, მილიონ 200 ათასი ლარით შემცირდა. ზურაბ სადათიერაშვილს შენიშვნები აქვს იმასთან დაკავშირებითაც, რომ მომავალი წლის ბიუჯეტში, საქონლისა და მომსახურების მუხლში, ხარჯები მნიშვნელოვნად გაზრდილია. ჯიმშერ გოგოლაურს მარტოხელა დედებისა და ახალშობილებისთვის ყოველთვიური დახმარება სურს. ოპოზიციონერმა დეპუტატმა ხელისუფლებას პრემიებისა და დანამატების გაცემა დამსახურების მიხედვით ურჩია.
ქალაქის დასუფთავება, კეთილმოწყობა და გამწვანება, მუნიციპალური ტრანსპორტის და შიდა ეზოების მოწესრიგება, საგზაო ნიშნების განთავსება და არასწორი მშენებლობების მონიტორინგი – ეს არის პრიორიტეტების ნაწილი, რომელთა გათვალისწინებაც მოქალაქეებმა ადგილობრივ ხელისუფლებას სთხოვეს. ქალაქის მომავალი წლის ბიუჯეტის ჩასასწორებლად, მერიას ვადა 10 დეკემბრამდე აქვს. მთავარი ფინანსური დოკუმენტის კორექტირების შემდეგ, პროექტი ისევ საკრებულოში, დასამტკიცებლად დაბრუნდება.
ავტორები: რუსუდან გვარამაძე, ნანა ინასარიძე.
