საქართველოს სახალხო დამცველმა სამცხე–ჯავახეთში ვიზიტი დაასრულა. უჩა ნანუაშვილმა შეხვედრები 7 და 8 დეკემბერს ახალციხისა და ადიგენის მუნიციპალიტეტებში გამართა.

სახალხო დამცველი სამცხე-ჯავახეთის სახელმწიფო უნივერსიტეტის სტუდენტებს შეხვდა. უჩა ნანუაშვილმა ახალგაზრდებს ომბუდსმენის აპარატის მანდატი, ადამიანის უფლებების კუთხით ქვეყანაში არსებული  გამოწვევები და მიღწევები გააცნო. ამის შემდეგ, სახალხო დამცველმა სტუდენტების შეკითხვებს უპასუხა. ახალგაზრდები ძირითადად, ადამიანის უფლებების დარღვევის კუთხით სამცხე–ჯავახეთში არსებული მდგომარეობით დაინტერესდნენ. კითხვები ასევე დაისვა, მოხეს სადავო შენობასთან დაკავშირებით კომისიის მიერ გამოტანილ გადაწყვეტილებაზე, შეზღუდული შესაძლებლობის მქონე პირებისა და პატიმრების უფლებებზე.

ომბუდსმენის აპარატმა უნივერსიტეტში სტუდენტებთან შეხვედრა პირველად გამართა. სახალხო დამცველის თქმით, ისინი ანალოგიური აქტივობების გაგრძელებას მომავალში გეგმავენ, როგორც სამცხე–ჯავახეთის უნივერსიტეტთან, ასევე სხვა უმაღლეს სასწავლებელებთანაც. უჩა ნანუაშვილმა შეხვედრა სტუდენტებთან ადამიანის უფლებათა კვირეულის ფარგლებში გამართა.

სტუდენტებთან შეხვედრის შემდეგ, სახალხო დამცველს ახალციხისა და ტაო–კლარჯეთის მიტროპოლიტმა უმასპინძლა. უჩა ნანუაშვილმა მეუფე თეოდორესთან რეგიონში არსებული პრობლემები განიხილა.  საუბრის ერთ–ერთი თემა იყო მოხის სადავო შენობის საკითხიც. სახალხო დამცველის თქმით, პრობლემის მოგვარებაზე ყველა მხარე თანხმდება. შესაბამისად, სახელმწიფოს მხრიდან ბევრი რამ არის გასაკეთებელი. შეხვედრის დასასრულს მეუფე თეოდორემ უჩა ნანუაშვილს საჩუქრად წიგნი – “ახალციხისა და ტაო–კლარჯეთის ეპარქია” გადასცა.

სახალხო დამცველმა რეგიონში ვიზიტი სამცხე–ჯავახეთის გუბერნატორთან შეხვედრით დაასრულა, რომელიც მედიისთვის დახურულ კარს მიღმა გაიმართა.

ომბურსმენი სამცხე–ჯავახეთში ორი დღის განმავლობაში იმყოფებოდა.  7 დეკემბერს უჩა ნანუაშვილი ადიგენის მუნიციპალიტეტის სოფელ მოხესა და ჭელაში მუსლიმ და მართლმადიდებელ მოსახლეობას შეხვდა.

ავტორები: თიკო კურტანიძე, ნანა ინასარიძე.