საარჩევნო სუბიექტებისთვის, სააგიტაციო მასალის ჩამოხსნის ბოლო ვადა ერთი კვირის წინ ამოიწურა, თუმცა რამდენიმე მაჟორიტარისა და მერის კანდიდატის პლაკატი, ახალციხეში, არაერთ ქუჩაზეა გაკრული.

ქალაქში, ყველაზე ხშირად, ,,ერთიანი ნაციონალური მოძრაობისა” და ,,ქართული ოცნების” სააგიტაციო მასალას შეხვდებით. მმართველ პარტიაში ამბობენ, რომ ახალციხეში დარჩენილ პლაკატებზე პასუხისმგებლობას იხსნიან. გიორგი გვარამაძემ სატელეფონო საუბარში აღნიშნა, რომ პარტიამ სააგიტაციო მასალა, კანონით განსაზღვრულ ვადებში ჩამოხსნა.

სააგიტაციო მასალის ჩამოხსნის ვადები,  საარჩევნო კოდექსის 46–ე მუხლის მე–8 პუნქტით რეგულირდება. ახალციხის საოლქო საარჩევნო კომისიაში განმარტავენ, რომ საარჩევნო სუბიექტებს პლაკატების ჩამოხსნის ვადა, ცესკოს მიერ, საპარლამენტო არჩევნების შემაჯამებელი ოქმის გამოქვეყნებიდან, მე–15 დღეს, პირველ დეკემბერს ამოეწურათ.

ქალაქის მერი, რომლის სააგიტაციო მასალასაც არაერთ ადგილზე შეხვდებით ფიქრობს, რომ ყველა პოლიტიკურმა სუბიექტმა, თავისი პლაკატი უნდა ჩამოხსნას. ვლადიმერ ზედგინიძე ამბობს, რომ კანონდამრღვევი პარტია ან კანდიდატი, საოლქო საარჩევნო კომისიამ უნდა დააჯარიმოს და არა თვითმმართველობამ.

დამოუკიდებელმა კანდიდატმა ნუგზარ პარუნაშვილმა და ,,თავისუფალი დემოკრატების” მაჟორიტარმა შალვა გოგლაძემ ,,მე–9 არხისგან” შეიტყვეს, რომ მათი პლაკატები, ქალაქში რამდენიმე ადგილზე, ჯერ კიდევ გაკრულია. ორივე მათგანმა განაცხადა, რომ სააგიტაციო მასალებს მათი მხარდაჭერები რამდენიმე დღეში ჩამოხსნიან. ,,ერთიან ნაციონალურ მოძრაობაში” ამბობენ, რომ ქალაქი მათი პლაკატებისგან გამოამინდების შემდეგ გაიწმინდება.

ავტორები: რუსუდან გვარამაძე, რამაზ ალავიძე.