„ეს არის დასავლეთთან დისტანცირების და რუსეთთან დაახლოების პროცესი“- ზურაბ ბატიაშვილი

პოლიტიკა

10.07.2024

საქართველოში მიღებული ე.წ „რუსული კანონის“ გამო ევროკავშირმა უკვე დაიწყო ფინანსური შეზღუდვები, რომელსაც ევროკავშირის უმაღლესი წარმომადგენლები უკვე აანონსებდნენ. პარლამენტის მიერ მიღებული კანონის პირველი მსხვერპლი, თავდაცვის სამინისტრო აღმოჩნდა, რადგან ევროკავშირმა საქართველოს 30 მილიონი ევროს დაფინანსება შეუჩერა, რომელიც თავდაცვისა და უსაფრთხოების სფეროს უნდა მოხმარებოდა.

აღნიშნულს ანალიტიკოსები აფასებენ და ამბობენ, რომ საქართველოს ხელისუფლების ქმედებების შემდეგ, ეს ლოგიკური გაგრძელებაა და დასავლეთისგან სხვა შეზღუდვებს კიდევ უნდა ველოდოთ.

„ეს არის დასავლეთთან დისტანცირების და რუსეთთან დაახლოების პროცესი, რომელიც დაჩქარდა „რუსული კანონის“ მიღების შემდეგ. ცუდია ის რომ, ეს დასაწყისია და კიდევ უფრო დავშორდებით დასავლეთს. საბოლოოდ კი ჩვენი ქვეყანა რკინის ფარდის მეორე მხარეს აღმოჩნდება. შეუძლია ევროკავშირს ან ამერიკას დაეხმაროს ბელარუსიის არმიას? ხომ არ შეუძლია, ასევეა საქართველოს შემთხვევაშიც, რადგან ამ ჯარს მითითებებს აძლევს საქართველოს ხელისუფლება, რომელიც არის პრორუსული, ლანძღავს დასავლეთს და მტრობაში ადანაშაულებს“- ამბობს ზურა ბატიაშვილი.

მისი თქმით, ქვეყანაში მდგომარეობის შესაცვლელად საქართველოს ერთი შანსი რჩება, 26 ოქტომბრის არჩევნებზე ან იგივე მდგომარეობაში დარჩნენ, ან ევროპულ ქვეყნად იქცნენ.

„ეს არ იქნება არჩევნები, ეს იქნება რეფერენდუმი, რა სურთ ქართველებს - ასე ცხოვრება თუ ევროპული ქვეყნის წევრობა. 26 ოქტომბერს, აღარ იქნება პარტიებს შორის არჩევნები, ეს არჩევნები იქნება იმაზე, თუ როგორ საქართველოში გვსურს ცხოვრება. ხელისუფლება ცდილობს ხალხის დატერორებას ომით. ამბობენ, რომ ისინი თუ არ იქნებიან, მაშინ ქვეყანაში ომი იქნება, არადა ომზე ყველაზე ხშირად ისინი ლაპარაკობენ“- ამბობს ანალიტიკოსი.

საქართველოში მიღებული კანონის გამო, აშშ-მ სანქციებთან ერთად შეაჩერა სამხედრო სწავლებებიც.

ათიათასობით მოქალაქის, საზოგადოებრივი და მედიაორგანიზაციების წინააღმდეგობის მიუხედავად, საქართველოს პარლამენტმა 14 მაისს კანონი "უცხოური გავლენის გამჭვირვალობის შესახებ" მაინც მიიღო, 28 მაისს კი საქართველოს პრეზიდენტის ვეტო დაძლია. საქართველოს ხელისუფლების წარმომადგენლების მტკიცებით, კანონის მიზანია, უცხოეთიდან შემოსული დაფინანსებები გამჭვირვალე იყოს.

კანონის მიხედვით, ის მედია და საზოგადოებრივი ორგანიზაციები, რომლებიც დაფინანსების 20%-ზე მეტს უცხოელი დონორებისგან იღებენ, იძულებულნი ხდებიან დარეგისტრირდნენ, როგორც "უცხოური ძალის ინტერესების გამტარებელი ორგანიზაცია", წინააღმდეგ შემთხვევაში დაჯარიმდებიან. მსგავსი კანონი 2012 წლიდან მოქმედებს რუსეთში. კანონის ამოქმედების შემდეგ ოკუპანტ ქვეყანაში მრავალი ორგანიზაცია დაიხურა. რუსეთში აღარ არსებობს დამოუკიდებელი მედია და სამოქალაქო საზოგადოება.