ოპოზიცია არჩევნების შედეგებს არ ცნობს

პოლიტიკა

27.10.2024

ცესკოს მონაცემებით,26 ოქტომბრის საპარლამენტო არჩევნებზე, ამომრჩეველთა აქტივობამ 58.73% შეადგინა. რეგისტრირებული 3 508 294 ამომრჩევლიდან კენჭისყრაში მონაწილეობა 2 060 412 მოქალაქემ მიიღო.

,,გახარია საქართველოსთვის" ლიდერის, გიორგი გახარიას შეფასებით, 26 ოქტომბრის არჩევნებზე სისტემური ხასიათი ჰქონდა ამომრჩევლების დაშინებას, მოსყიდვას, პირადობის მოწმობებით მანიპულირებას, საჯარო მოხელეებზე და სოციალურად დაუცველებზე ზეწოლასა და დაშინებას.

"ფაქტია, დადასტურებულად შეიძლება ითქვას, ეს არაა მხოლოდ აღქმები, რომ ივანიშვილმა საქართველოს მოქალაქეების ნებაზე იძალადა. და ის არჩევნები ის შედეგები, რომლებიც გამოქვეყნდა, არ ასახავს ქართველი ხალხის ნებას. ეს არ მომხდარა სამწუხაროდ, გუშინ და არ მომხდარა ერთ დღეში. ჩვენ დიდი ხანია ამაზე ვსაუბრობდით, ვსაუბრობდით ფაქტებით, მტკიცებულებებით, რომელიც გადავეცით ჩვენს პარტნიორებს, მათ შორის საერთაშორისო დამკვირვებლებს, ლოკალურ საერთაშორისო მისიებს.

,,ახლა გონივრული პროტესტის და 24 საათიანი შრომის დროა. ოცნებას" ტყუილად ჰგონია, რომ ცესკოს გამოცხადებული შედეგები საკმარისია იმისთვის, რომ ეს არჩევნები ლეგიტიმურად ჩაითვალოს", - აღნიშნა გახარიამ.

KGB-ს სპეცოპერაცია - ასე აფასებს "ძლიერი საქართველო" - ლელო, ხალხისთვის, თავისუფლებისთვის ლიდერი 26 ოქტომბრის არჩევნებს. ხაზარაძე წერს, რომ ეს შედეგი სრულიად მიუღებელია და არასოდეს დაეთანხმება.

"სრულიად გასაგებია, რა მოხდა. ბიძინამ KGB-ს სპეცოპერაცია ჩაატარა. არჩევნები ტოტალურად გაყალბდა, ხალხის ხმა მიითვისეს და ქვეყანას რუსეთისთვის ამზადებენ, არ გამოვა ეს ამბავი! ამ სიყალბეს არ და ვერ დავეთანხმები... არასდროს!", - წერს ხაზარაძე.

ჩვენ მიტაცებული არჩევნების შედეგებს არ ვიღებთ და ჩვენ ამ მოპარული შედეგების აღიარებას არ ვაპირებთ, - ამის შესახებ “ერთიანობა - ნაციონალური მოძრაობის” თავმჯდომარემ თინა ბოკუჩავამ ბრიფინგზე განაცხადა. როგორც ბოკუჩავამ განაცხადა, ერთობა აპირებს ბრძოლას ევროპული მომავლის დასაბრუნებლად.

,,დღევანდელი ისტორიული არჩევნები იყო ქართველი ხალხის გამარვება და რჩება ქართველი ხალხის გამარჯვებად, მაგრამ ჩვენ ვხედავთ, რომ ცესკომ შეასრულა ივანიშვილის ბინძური დაკვეთა და გამოაცხადეს შედეგები, რომელიც ქაჩვენებს, რომ ოლიგარქმა ივანიშვილმა ქართველ ხალხს გამარჯვება მოპარა და ამით მოპარა ევროპული მომავალი. ის გამარჯვება, რომელიც მოიპოვა ქართველმა ხალხმა, არ ეკუთვნის რომელიმე ერთ პარტიას, არამედ ეკუთვნის მთლიანად ქვეყანას და ოპოზიციას, რომელსაც ერთობლივად მისცა ნდობის მანდატი ქართველმა ხალხმა. ჩვენ ვიბრძოლებთ როგორც არასდროს, ჩვენი ევროპული მომავლის დასაბრუნებლად და არ შევეგუებით მოპარული არჩევნების შედეგებს”, - განაცხადა ბოკუჩავამ.

ეს არის საკონსტიტუციო გადატრიალება, “ქართული ოცნება” არის საკონსტიტუციო გადატრიალების ავტორი , - ამის შესახებ “კოალიცია ცვლილებისთვის” ლიდერმა ნიკა გვარამიამ გამართულ ბრიფინგზე განაცხადა. მისი თქმით, “ქართულ ოცნებას” ოპოზიციის გამარჯვების აღიარება მოუწევს.

“ამ არჩევნების შედეგს ჩვენ არ ვაღიარებთ, არჩევნები არის მოპარული, საქართველოში ხელისუფლების უზურპაცია მოხდა, ეს არის საკონსტიტუციო გადატრიალება, “ქართული ოცნება” არის საკონსტიტუციო გადატრიალების ავტორი და ამაზე “ქართული ოცნება” აგებს პასუხს აუცილებლად, იმ წესით, როგორი წესითაც ითვალისწინებს საქართველოს კანონმდებლობა, მაგრამ ვიდრე ეს მოხდება, “ქართულ ოცნებას” მოუწევს ოპოზიციის გამარჯვების აღიარება”, - განაცხადა გვარამიამ.

,,კონსულტაციები იქნება პრეზიდენტთანაც გასავლელი, უცხოელ პარტნიორებთანაც, არასამთავრობო სექტორთანაც. მე მომხრე ვარ, გადაწყვეტილება, როდესაც გამოცხადება მკაფიოდ, ამას თან ახლდეს ღირსებით სავსე ნაბიჯები”, - განაცხადა ნიკა მელიამ.