რუსეთის საკუთარ მოქალაქეებს აფხაზეთის დატოვებისკენ მოუწოდებს

პოლიტიკა

16.11.2024

რუსეთის საგარეო უწყება საკუთარ მოქალაქეებს აფხაზეთის დატოვებას ურჩევს.

,,რუსეთში შეშფოთებით აკვირდებიან მეზობლად მიმდინარე მოვლენებს ჩვენთვის მეგობრულ აფხაზეთში, სადაც შიდაპოლიტიკური წინააღმდეგობები კვლავ გამწვავდა. ოპოზიციურმა ძალებმა, სამწუხაროდ, ქვეყნის კანონიერ ხელისუფლებასთან უთანხმოების ცივილიზებული, ურთიერთპატივისცემაზე დაფუძნებული დიალოგის გზით რეგულირება შეუძლებლად ჩათვალეს და კანონიერების ჩარჩოდან გამოვიდნენ, რითაც კონფლიქტის ესკალაცია გამოიწვიეს.

შედეგად, რესპუბლიკაში კრიზისული ვითარება დადგა და ეს, მიუხედავად მისი მომავალი დასასრულისა, აფხაზეთის განვითარებას აჩერებს. კერძოდ, ცხადია, რომ ახლანდელის მსგავსი სცენარები არანაირად არ უწყობს ხელს საგარეო ინვესტიციების მიზიდვას, რაც რესპუბლიკის სოციალურ-ეკონომიკური ამაღლებისთვის წონიანი ფაქტორია.

რუსული მხარე აფხაზეთის შიდა პროცესებში არ ერევა და იმედოვნებს, რომ წარმოქმნილი ვითარება მხოლოდ მშვიდობიანი პოლიტიკური გზით იქნება დარეგულირებული. ამასთან, რა თქმა უნდა, აფხაზეთის კანონები საგულდაგულოდ უნდა იყოს დაცული, მათ შორის, საზოგადოებრივი წესრიგის დაცვის მხრივ.

შექმნილ ვითარებაში რუსეთის საგარეო საქმეთა სამინისტრო იძულებულია, რუსეთის მოქალაქეებს ურჩიოს, რომ თავი შეიკავონ აფხაზეთში მგზავრობისგან, მათ შორის, ტურისტული მიზნებითაც. მნიშვნელოვანია, რომ იმ რუსებმა, რომლებიც ამ სახელმწიფოში დროებითი იმყოფებიან, გაძლიერებული დაკვირვებულობა გამოავლინონ, არეულობის წერტილებს არ მიუახლოვდნენ და, შესაძლებლობის შემთხვევაში, ქვეყანა დატოვონ“,-წერია განცხადებაში.

ოკუპირებული აფხაზეთის ე.წ. მთავრობა რუსეთთან საინვესტიციო შეთანხმების პროექტს გაიწვევს, - ამის შესახებ ინფორმაციას ოკუპირებული აფხაზეთის ე.წ. პრეზიდენტის ასლან ბჟანიას პრესსამსახური ავრცელებს.

„მსგავსი გადაწყვეტილება რესპუბლიკაში ვითარების სტაბილიზებისთვის იქნა მიღებული“, - - ნათქვამია განცხადებაში.

აქამდე ოპოზიციამ ბჟანიას „პრეზიდენტის” თანამდებობიდან უპირობოდ გადადგომის მოთხოვნა წამოაყენა. დემონსტრანტთა ნაწილი ოკუპირებული რეგიონის „პარლამენტში” შეიჭრა.