პარლამენტში, მუნიციპალიტეტისა და ავტონომიური რესპუბლიკების წარმომადგენლობით ორგანოებში „გენდერული თანასწორობის საბჭოები“ აღარ იარსებებს

პოლიტიკა

28.02.2025

საქართველოს პარლამენტში, ასევე, მუნიციპალიტეტისა და ავტონომიური რესპუბლიკების წარმომადგენლობით ორგანოებში გენდერული თანასწორობის საბჭოები აღარ იარსებებს. მათ გაუქმებას “ქართული ოცნებისა“ და “ხალხის ძალის“ დეპუტატების მიერ ინიციირებული საკანონმდებლო პაკეტი ითვალისწინებს.

კანონებიდან ყველა ის ნორმა ამოდის, რომელიც გენდერული თანასწორობის საბჭოების საქმიანობას ითვალისწინებს.

გარდა ამისა, საქართველოში მოქმედი ყველა კანონიდან ტერმინი “გენდერი“ და “გენდერული იდენტობა“ ამოდის. “გენდერული თანასწორობის შესახებ“ კანონს კი სახელწოდება შეეცვლება და მას “ქალისა და მამაკაცის თანასწორების შესახებ“ კანონი დაერქმევა.

საკანონმდებლო პაკეტზე, დღეს 28 თებერვალს, პარლამენტის ადამიანის უფლებათა დაცვის კომიტეტი იმსჯელებს.

პარლამენტში წარდგენილი პროექტის თანახმად, კანონებში არსებული ჩანაწერი “გენდერული საკითხები“ შეიცვლება ჩანაწერით - “ქალისა და მამაკაცის თანასწორობის საკითხები“, ტერმინი “გენდერის ნიშნის შეუწყნარებლობა“ იცვლება “ქალისა და მამაკაცის თანასწორობისადმი შეუწყნარებლობით“, კანონში გამოყენებული სიტყვები “გენდერულად მგრძნობიარე“, შეიცვლება სიტყვებით “სქესის ნიშნისადმი მგრძნობიარე“ და ასე შემდეგ.

“საქართველოს კანონმდებლობაში გარკვეული პერიოდის განმავლობაში, უცხოური გავლენისა და მათი წარმომადგენლების აქტიური ლობირებით, მიზანმიმართულად ხდებოდა ხელოვნური ტერმინის - “გენდერის“ დანერგვა.

აღნიშნული მსოფლიოში მიმდინარე გლობალური პროცესების ერთგვარ ანარეკლს და სახელმწიფოსთვის, რიგ შემთხვევებში, გადაულახავ დაბრკოლებას წარმოადგენდა.

გლობალური ტენდენციების მასშტაბის საილუსტრაციოდ გამოდგება მაგალითი, რომლის თანახმად, ამერიკის შეერთებული შტატების წინა ადმინისტრაციის პირობებში სახელმწიფო დეპარტამენტი თანამშრომლებისთვის მიცემული სახელმძღვანელო წესების ერთ-ერთ ბოლოდროინდელ დოკუმენტში უთითებდა, რომ მორიდებოდნენ ისეთი სიტყვების გამოყენებას, როგორებიც არის: “ბიჭებო“, “ქალბატონებო და ბატონებო“, “დედა/მამა“, “ვაჟი/ქალიშვილი“, “ქმარი/ცოლი“, ხოლო ამ სიტყვების ნაცვლად უნდა გამოიყენონ გენდერულად ნეიტრალური შემდეგი სიტყვები: “ყველა“, “ხალხო“, “თქვენ ყველა“, “მშობელი“, “შვილი“, “მეუღლე“, “პარტნიორი“.

აღნიშნული უარყოფითი პროცესები საზღვარგარეთ დღესაც არ კარგავს აქტუალობას, თუმცა აღსანიშნავია, რომ ამერიკის შეერთებულ შტატებში პრეზიდენტად დონალდ ტრამპის არჩევის შემდეგ, სულ უფრო მეტად გააქტიურდა საუბარი აღნიშნული ხელოვნური პროცესის არაკეთილსინდისიერი მოტივებისა და მართულობის შესახებ. ცხადი გახდა, რომ აღნიშნული იდეოლოგიის ლობირების უკან იდგა არა ადამიანის უფლებების დაცვის აღმატებული ინტერესი, არამედ სხვა სახელმწიფოების შიდა საქმეებში ჩარევისა და მათზე გავლენის მოპოვების პრაგმატული გათვლა“, - წერს “ქართული ოცნება“ კანონის პროექტის განმარტებით ბარათში.

კანონპროექტის ავტორი და ინიციატორები არიან პარლამენტის წევრები: არჩილ გორდულაძე, თორნიკე ჭეიშვილი, რატი იონათამიშვილი, დავით მათიკაშვილი, გურამ მაჭარაშვილი, ალექსანდრე ტაბატაძე, თენგიზ შარმანაშვილი, ალუდა ღუდუშაური, ვიქტორ ჯაფარიძე, სოზარ სუბარი, ნოდარ ტურძელაძე, ირმა ზავრადაშვილი, ლევან მაჭავარიანი, რამინა ბერაძე, ირაკლი კირცხალია, სალომე ჯინჯოლავა, თორნიკე ბერეკაშვილი, გენრიეტა წიწავა, მამუკა მდინარაძე.

თეგები: გენდერი / პარლამენტი / ცვლილებები /

Հեղինակ:

Tv9news

Երկ.

Երեք.

Չոր.

Հինգ.

Ուրբ.

Շաբ.

Կիր.