უსაფრთხოა თუ არა ცხოვრება კორპუსში, სადაც აფეთქება მოხდა- ექსპერტიზის დასკვნა ცნობილია

საზოგადოება

27.03.2021

ახალციხეში, რუსთაველის#99-ში მომხდარი აფეთქების შედეგად, მნიშვნელოვანი დაზიანება პირველ სართულზე განთავსებულმა რესტორანმა „იმერეთმა“, მიშენების გადახურვებმა და გარე კედლის ნალესმა მიიღო - წერია ლევან სამხარაულის სახელობის სასამართლო ექსპერტიზის ეროვნული ბიუროს 2021 წლის 4 იანვრის საინჟინრო ექსპერტიზის დასკვნაში, რომელიც ახალციხის მერიიდან გამოვითხოვეთ.

ექსპერტთა ჯგუფმა კორპუსის მდგომარეობა არადამაკმაყოფილებლად შეაფასა. დასკვნის მიხედვით, ხუთსართულიან კორპუსში მაცხოვრებელთა დაბრუნება, მხოლოდ რეაბილიტაციის შემდეგ იქნება შესაძლებელი.

„შენობის ტექნიკური მდგომარეობიდან გამომდინარე შეიძლება შეფასდეს არადამაკმაყოფილებლად, რადგან ნაგებობის გარკვეულ ნაწილში, კონსტრუქციული ელემენტების დარღვევისა და ნგრევის გამო, დაკარგული აქვს სივრცითი სიხისტე. მოცემულ მომენეტში საშიშროებას წარმოადგენს ის გარემოება, რომ სარდაფის ჩრდილოეთის გრძივ კედლებში გრუნტის დაწოლის შედეგად, შეიძლება მოხდეს დეფორმაციების განვითარება. აფეთქებით გამოწვეული დაზიანების ლოკალური ხასიათიდან გამომდინარე შესაძლებელია, აღდგენითი სამუშაოების შესრულების შემდგომ, შენობის უსაფრთხო ექსპლუტაცია“, - წერია დასკვნაში.

ექსპერტიზის დასკვნის მიხედვით, აფეთქების დროს მთელი შენობა რომ არ დაზიანდა, ამაში მნიშვნელოვანი როლი რესტორან „იმერეთის“ ჩრდილოეთის მხარეს მიშენებულმა ვიტრაჟმა იქონია, რადგან ეს იყო ის სუსტი ადგილი, რა მიმართულებითაც გაიშალა აფეთქების ძლიერი ტალღა. ამით მოხდა დამანგრეველი ძალის დასუსტება და არ მიეცა მას ზემოთ გავრცელების საშუალება. აქედან გამომდინარე, ნგრევის არეალი შემოიფარგლა მხოლოდ პირველი სართულის იატაკით.

„შენობის ვიზუალურად დათვალიერების შედეგად დაფიქსირებულ დაზიანებებს, გარდა პირველი სართულის იატაკისა, სხვა ძლიერი დაზიანებები არ მიუღია, თუ არ ჩავთვლით სადარბაზოების მხარეს მიშენების გადახურვებში გადახურვის ელემენტებს შორის და გარე კედლის ნალესში ბზარების გაჩენას, პირველი სართულის გარე ფასადური კედლების ცალკეულ ადგილებში ნალესების ჩამოცვენას, რომლებიც გამოიწვია აფეთქების შედეგად წარმოებულმა ვიბრაციებმა. ეს დაზიანებები შენობის მდგრადობისთვის საფრთხეს არ წარმოადგენს, შენობის დანარჩენ ნაწილში ბზარები და დეფორმაციები არ ფიქსირდება“.

ექსპერტების შეფასებით, შენობის გაწმენდითი სამუშაოების უსაფრთხოდ ჩასატარებლად პირველ რიგში უნდა მოხდეს დროებითი გამაგრებითი სამუშაოების ჩატარება.

„გაწმენდითი სამუშაოები არ არის რეკომენდირებული, რადგან ვიბრაციები, რომლებიც შესაძლოა თან ახლდეს ამ სამუშაოებს (დიდი მოცულობის ნანგრევების დაშლა და გატანა), უარყოფით ზეგავლენას მოადენს შენობის მდგომარეობაზე.

ჩატარდეს კვლევა წინასაპროექტო აფეთქების არეალში კონსტრუქციული ელმენტების ფიზიკური მდგომარეობის შესასწავლად.

მოხდეს შენობის აღდგენა-გაძლიერების ოროქეტის დამუშავება და მის საფუძველზე სამშენებლო სამუშაოების ჩატარება.

პროცესის განმავლობაში მიზანშეწონილი არ არის მოსახლეობის საცხოვრებელ ბინებში შეშვება“.

ახალციხის მერიაში ამბობენ, რომ მოსამზადებელი სამუშაოები დაწყებულია. პრესსამსახუში გვითხრეს, რომ ადგენენ, დაზინებულ შენობაში რა სახის სარეაბილიტაციო სამუშაოები უნდა განხორციელდეს. ამის მიხედვით მოზადდება პროექტი.

„ამ ეტაპზე მუნიციპალიტეტის მხრიდან დაწყებულია შესაბამისი პროცედურები პროექტირებასთან დაკავშირებით, მომზადდება პროექტი და შემდგომში განხორციელდება შენობის სარეაბილიტაციო სამუშაოები“.

კორპუსის 11 ოჯახს, რომელსაც სხვა საცხოვრებელი არ ჰქონდა, ახალციხის მერიამ ბინები უქირავა. მათი საცხოვრებლით უზრუნველყოფისთვის, თვითმმართველობა ადგილობრივი ბიუჯეტიდან ყოველთვიურად 3 356 ლარს იხდის.

ხუთსართულიანი კორპუსის სარდაფში აფეთქება 24 დეკემბერს მოხდა. შემთხვევა სავარაუდოდ, ბუნებრივი აირის დაგროვებამ გამოიწვია. შედეგად დაზიანდა კორპუსის სარდაფები და პირველ სართულზე განთავსებული რესტორანი.

დაშვდა ორი პირი, რომელიც აფეთქების დროს სარდაფში იმყოფებოდა. ისინი მაშველებმა ნანგრევებიდან ამოიყვანეს.

მომხდარზე გამოძიება სისხლის სამართლის კოდექსის 240-ე პრიმა მუხლით მიმდინარეობს, რაც გაზის ობიექტზე უსაფრთხოების წესების დარღვევას გულისხმობს.