ბავშვები საუბრობენ ისეთ ფაქტებზე, რაც უახლოვდება წამებას და არაადამიანურ მოპყრობას - ლომჯარია

საზოგადოება

18.06.2021

სახალხო დამცველი ნინო ლომჯარია არ გამორიცხავს, რომ ნინოწმინდის ბავშვთა პანსიონატთან დაკავშირებით სისხლის სამართლის საქმეების რაოდენობა გაიზარდოს.

როგორც მან განაცხადა, აღსაზრდელების მხრიდან პანსიონატის დატოვება საკმარისი არაა, რადგან საქმე ეხება არა მხოლოდ მსუბუქი ფორმით დასჯას, არამედ წამებასთან დაახლოებულ ქმედებებს. ამასთან, ლომჯარია პროკურატურას მიმართავს და აღნიშნავს, რომ მნიშვნელოვანია, სახალხო დამცველის აპარატს პანსიონატთან დაკავშირებით მიმდინარე საგამოძიებო საქმეების მასალებზე წვდომა ჰქონდეს.

„მნიშვნელოვანია, რომ გამოძიება წარიმართოს სრულყოფილად და ეფექტურად. ამისთვის მნიშვნელოვანი იქნება საგამოძიებო მასალის გაცნობაც. ის, რომ პანსიონი დატოვონ, საკმარისი არა. ბავშვებისგანაც მომისმენია კონკრეტული სახელი და გვარები, გარკვეული ინდივიდები არიან იდენტიფიცირებულები. ეს არ იყო მხოლოდ მსუბუქი ფორმით სხეულებრივი დასჯა, ბავშვები საუბრობენ ისეთ ფაქტებზე, რაც ჩემი შეფასებით უახლოვდება წამებას და არაადამიანურ მოპყრობას. მნიშვნელოვანი იქნება ამ საქმეების კვალიფიკაცია“, - განაცხადა ლომჯარიამ.

რაც შეეხება მეუფე იაკობთან გამართულ შეხვედრას, როგორც ლომჯარია აცხადებს, გამოითქვა სურვილი, რომ შეიქმნას საცხოვრებელი, სადაც ის ბავშვები განთავსდებიან, ვისაც პანსიონატიდან გადასვლა არ სურთ. თუმცა, სახალხო დამცველის აზრით, პანსიონატიდან ყველა ბავშვი სხვა გარემოში უნდა გადავიდეს.

„მეუფე იაკობის მხრიდან არ ყოფილა უარყოფა იმ ფაქტისა, რომ აღზრდის ის მეთოდები, რომელიც პანსიონში არსებობდა, იყო ძალადობრივი. ასევე აღნიშნა, რომ ასეთი ფორმით ბავშვთა დაწესებულების არსებობა მისთვის მიუღებელია. შესაბამისად, ის მიიჩნევს, რომ ყველა იმ ბრალდებაზე, რაც ბავშვების მხრიდან იყო გამოთქმული, გამოძიება უნდა მოხდეს.

ჩემი მხრიდან, დაყენებული იყო საკითხი, რომ აუცილებელია, შეწყდეს როგორც იქ მყოფი ბავშვების, ასევე ყოფილი ბენეფიციარების მიმართ ნებისმიერი სახის ფსიქოლოგიური თუ სხვაგვარი ზეწოლა. მე ვუთხარი მათ, რომ ეს ბავშვები მსგავს ზეწოლას განიცდიან და მნიშვნელოვანია ამ პრობლემების აღიარებით მივცეთ ბავშვებს შესაძლებლობა, რომ მშვიდად იყვნენ, არ ხორციელდებოდეს მათზე რაიმე ტიპის ზეწოლა და შეეძლოთ ამ პრობლემებზე საუბარი.

დარჩენილ 20 ბავშვთან დაკავშირებით ჩემი ხედვაა, რომ ყველა ბავშვი უნდა გადანაწილდეს ან საკუთარ ოჯახებში, ან ოჯახთან მიახლოებულ სივრცეში. ამაზე წინააღმდეგობა არ იყო, მაგრამ გამოითქვა სურვილი, რომ ადგილზე შეიქმნას საცხოვრებელი, რომ იცხოვრონ იმ ბავშვებმა, ვისაც გადასვლა არ სურთ. მაგრამ მე ვფიქრობ, პანსიონიდან ყველა ბავშვი უნდა იყოს გამოყვანილი და სხვა გარემოში უნდა გადავიდნენ“, - განაცხადა ლომჯარიამ.