ახალციხეში, კონსერვატიული მოძრაობის ოფისს ,,საბჭოთა ნოსტალგიებს" უწუნებენ

საზოგადოება

06.03.2022

ალტ-ინფოსთან დაკავშირებული კონსერვატიული მოძრაობის ოფისზე გაკეთებული წარწერები უკვე წაშლილია. ქართულ და რუსულ ენებზე განცხადებები ძირითადად პუტინის წინააღმდეგ იყო მიმართული.

ადგილობრივი ოფისის წარმომადგენელი სიმონ ეღიაშვილი ამბობს, რომ დედაქალაქში იმყოფება, მომხდარის შესახებ იცის, მაგრამ კომენტარის გაკეთებისგან თავს იკავებს. მისივე თქმით, ამ დრომდე გადაწყვეტილი არ აქვთ, მომხდარის გამო მიმართავენ თუ არა სამართალდამცველებს.

კონსერვატიული მოძრაობის ოფისზე გაკეთებული წარწერა არ უკვირთ ახალციხის საზოგადოებრივ ორგანიზაციებში. ,,დემოკრატ მესხთა კავშირის" წარმომადგენელი ჯაბა ნათენაძე ერთ-ერთი პირველი იყო, ვინც ამის შესახებ ინფორმაცია გაავრცელა. ამბობს, რომ მსგავსი ფაქტი მისთვის მოულოდნელი არ არის, რადგან

,,მაშინ როცა რუსული პროპაგანდა გამალებით, ყველა გზებით ცდილობს, მთელი მსოფლიო დაარწმუნოს იმაში, რომ უკრაინას კი არ ებრძვის არამედ ათავისუფლებს, მთელმა ცივილურმა სამყარომ გაიაზრა, რომ აუცილებელია ამ პროპაგანდის გავრცელების შეფერხება. რა ხდება ამ დროს ჩვენთან - თავისუფლად იხსნება ოფისები, რომლებიც პირდაპირ ეწევიან რუსულ პროპაგანდას და ამდენი შემზარავი ვიდეოს, ფოტო ამბების შემხედვარე, სწორედ ეს პუტინის სატელიტი პროპაგანდისტები, ხალხს უყვებიან საპირისპიროს. რა თქმა უნდა, ეს გამოიწვევს საზოგადოების აგრესიას და ვფიქრობ, რომ ამ აგრესიის გამოხატულებაა ეს ფაქტიც. შეიძლება გამოხატვის ფორმები ბევრისთვის მიუღებელი იყოს, მაგრამ თავად ადგილობრივმა ოფისმაც სწორედ აგრესიის გზა აირჩია გახსნისთანავე (თუნდაც მათი დამოკიდებულება მედიასთან).

მაშინ, როცა ჩვენ ყველა ვამაყობთ უკრაინელი ხალხის ერთიანობით, ჩვენ ვერა და ვერ ვისწავლეთ, პირადი ბოღმის და ეროვნული ინტერესების ერთმანეთისგან განსხვავება. ამ ფონზე ხშირად საკუთარ ამბიციებს ვწირავთ, ჩვენი ქვეყნის აწმყოსა და მომავალს" - აღნიშნავს ჯაბა ნათენაძე.

ფაქტს ეხმაურებიან სოციალურ ქსელშიც.

,,მაგარი იუმორი აქვს ვიღაცას .. ისეთ ფრაზასაც მოფიქრება უნდა, ყველაფერს რომ ჩაიტევს შიგ და იტყვის .. " - მიაჩნია დავით მელიქიძეს.

,,ყველა მოღალატემ უნდა იგრძნოს, რომ მოღალატეა! ძალიანაც კარგი.." - წერს გაგა მუმლაძე.

,,ყოჩაღ. ვინც მიაქირავებს ფართს, ისიც მოღალატეა " - ფიქრობს მინდია ბაჟუნაიშვილი.

,,ბრავო...ვინც არ უნდა იყო, ვამაყობ შენი ქართველობით" - წერს მარი დალალიშვილი.

,,ახლა ვნახე მთავარზე... ანუ ჯერ სტალინის ძეგლს მოაძვრეს თავი ვარიანში და მერე ახალციხეს ჩამოურბინეს... ერთი და იგივე ჩაცმულობით იყო ბიჭი და მაგან მიიქცია ყურადღება" - წერს ქეთინო ხმალაძე.

ახალციხეში "კონსერვატიული მოძრაობის" ოფისი 13 თებერვალს გაიხსნა. პარტიის ადგილობრივი წარმომადგენელი სიმონ ეღიაშვილი საზოგადოებას გენერალურმა მდივანმა გიორგი ქარდავამ წარუდგინა.