რა მოსდის საპენსიო დანაზოგს პირის გარდაცვალების შემთხვევაში?

საზოგადოება

30.07.2024

2024 წლის 30 ივნისის მდგომარეობით, საპენსიო სქემაში გაწევრიანებულ მონაწილეთა რაოდენობა 1 მილიონ 529 ათასი ადამიანია. ამის შესახებ ინფორმაციას საპენსიო სააგენტო ავრცელებს.

მათივე ცნობით, მიმდინარე წლის 30 ივნისის მდგომარეობით, დაგროვებითი პენსიით უკვე ისარგებლა სხვადასხვა კატეგორიის 11 114-მა პირმა, მათზე პენსიის სახით გაიცა 38.9 მლნ ლარი.

საქართველოში დაგროვებითი პენსიის სისტემა 2019 წლიდან მოქმედებს, რომლის მიხედვითაც საპენსიო სქემაში ჩართული მოქალაქეების ანგარიშზე მათი ხელფასის 6% ირიცხება. კერძოდ, 2%-ს თავად დასაქმებული, 2%-ს დამსაქმებელი, ხოლო დანარჩენ 2%-ს სახელმწიფო იხდის.

მართალია სისტემის ამოქმედებიდან რამდენიმე წელი გავიდა, თუმცა მოქალაქეებს რიგ საკითხებთან დაკავშირებით მაინც აქვთ გარკვეული კითხვები, მაგალითისთვის რამდენად დაცულია მათი საპენსიო აქტივები, როგორ, როდის ან რა საფუძვლით არის საპენსიო აქტივის მიღება შესაძლებელი, რა მოსდის საპენსიო დანაზოგს პირის/მონაწილის გარდაცვალების შემთხვევაში და ა.შ.

აღსანიშნავია, რომ მსგავს ხშირად დასმულ შეკითხვებზე პასუხების მიღება მოქალაქეებს, თავად საპენსიო სააგენტოს ვებ-გვერდზე შეუძლიათ. გთავაზობთ რამდენიმე შეკითხვას და მასზე საპენსიო სააგენტოს პასუხს:

რა მოსდის საპენსიო დანაზოგს მონაწილის გარდაცვალების შემთხვევაში?

მონაწილის გარდაცვალების შემთვევაში, მის ინდივიდუალურ საპენსიო ანგარიშზე აღრიცხული საპენსიო აქტივებს შესაბამისი თანხა, კანონმდებლობით დადგენილი წესითა და პირობებით, გადაეცემა მონაწილის კანონიერ მემკვიდრე(ებ)ს.

საპენსიო სააგენტოსთვის მონაწილის მემკვიდრის სათანადო მომართვის შემთხვევაში, მონაწილის მემკვიდრისთვის საპენსიო აქტივების გადაცემა შეიძლება ერთიანი გადახდით, ან საპენსიო აქტივების მონაწილის მემკვიდრის ინდივიდუალურ საპენსიო ანგარიშზე გადატანის გზით.

რა საფუძვლით არის შესაძლებელი დაგროვებით პენსიის/საპენსიო აქტივების მიღება?

„დაგროვებითი პენსიის შესახებ“ საქართველოს კანონის საფუძველზე, პენსიის/საპენსიო აქტივების მიღება შესაძლებელია შემდეგ შემთხვევებში:

მონაწილის მიერ საპენსიო ასაკის მიღწევისას;
მონაწილის შესაძლებლობის შეზღუდვისას;
საპენსიო აქტივების მონაწილის მემკვიდრისთვის გადაცემა;
საქართველოს სამუდამოდ დატოვებისას.