ვაჭრობისთვის 9 ჯიხური აქვთ გამოყოფილი, საზოგადოებრივ სივრცეს კი ნუ დაიკავებენ – ასე გამოეხმაურა ბორჯომის მუნიციპალიტეტის გამგებლის მოადგილე ადგილობრივ მოვაჭრეთა დახლების აღების ფაქტს. ანზორ სვანიძის თქმით, 2012 წლის საკრებულოს დადგენილებაში მითითებულია ადგილები, სადაც გარევაჭრობა აკრძალულია. ასეთია პარკის მიმდებარე ტერიტორიაზე 9 აპრილის ქუჩა, სადაც დღეს დილით მისულ მოვაჭრეებს დახლები აღებული დახვდათ.

გამგებლის მოადგილის განმარტებით, ყოველ წელს ხორციელდებოდა კონტროლი თუმცა პრობლემები მუდმივად იყო. ამიტომ გადაწყვიტეს არაერთი გართხილების შემდეგ, პრობლემა ამ გზით მოეგვარებინათ.

"მანამდე მოხდა გაფრთხილება, სიტყვიერად, შემდეგ წერილობით. ამის მიუხედავად ისევ აგრძელებდნენ ვაჭრობას. დღეს დილით ჩვენმა კეთილმოწყობის სამსახურმა მოახდინა დახლების დემონტაჟი. ეს იყო ძირითადად ხის კონსტრუქციები. მოხდა მხოლოდ დემონტაჟი და არა დაშლა. ეს მასალა ინახება კეთილმოწყობის სამსახურის ტერიტორიაზე. ამის წაღება შეუძლიათ, უბრალოდ იმ ადგილზე ვეღარ განათავსებენ.

ხის კონსტრუქციები არ არის დამტვრეული. თუ არის, შეიძლება ეს შემთხვევით მოხდა.

ქალაქში ვერსად ვერ განათავსებენ დახლებს, 9 ჯიხური გამოყოფილი აქვთ ვაჭრობისთვის, საზოგადოებრივ სივრცეს კი ნუ დაიკავებენ, აქვთ საკუთარი ეზოები და იქ განათავსონ" – განუცხადა "მეცხრე არხს" ანზორ სვანიძემ.

გამგებლის მოადგილის განმარტებით, 9 აპრილის ქუჩაზე სამი წლის წინ მუნიციპალიტეტმა 9 ჯიხური ააშენა. გამგეობამ მოვაჭრეებს ტერიტორია ერთთვიანი უფასო სარგებლობით გადასცა, რომელიც შემდეგ აუქციონის წესით შეისყიდეს. ანზორ სვანიძე ირწმუნება, რომ აქ საუბარი იყო ჯიხურებში ვაჭრობაზე და არა მის გარეთ.

"გარდა იმისა, რომ ჯიხურებში მოვაჭრეებს ჰქონდათ დახლები გარეთ გამოტანილი, კონსტრუქციები ჰქონდათ განთავსებული სხვებსაც, რომელთაც ნებერათვა საერთოდ არ აქვთ. იქ არის 9 აპრილის სკვერი, ბორჯომის ბიუვეტი, 9 აპრილის მემორიალი, იქ მისვლა საერთოდ შეუძლებელი იყო და ფარავდა ყველაფერს" – განმარტავს გამგებლის მოადგილე.

ანზორ სვანიძის თქმით, ყოველდღიური კონტროლი გაგრძელდება და იმ შემთხვევაში თუ მოვაჭრეები დახლებს ისევ განათავსებენ მუნიციპალიტეტი იგივე ზომებს მიმართავს.