საბაჟოზე ხუთ დღეში 26 740 ღერი არადეკლარირებული სიგარეტი ამოიღეს

სამართალი

06.05.2019

წითელ ხიდზე, ბათუმის აეროპორტში, ყაზბეგში, ლაგოდეხში, ნინოწმინდასა და სადახლოზე 26 740 ღერი არადეკლარირებული სიგარეტი აღმოაჩინეს - ინფორმაციას შემოსავლების სამსახურის ავრცელებს.

უწყების ცნობით, 30 აპრილიდან 5 მაისის ჩათვლით, საბაჟო გამშვებ პუნქტებში, არადეკლარირებული სიგარეტის ქვეყნის საზღვარზე კანონდარღვევით შემოტანის მცდელობის ფაქტები აღიკვეთა. საქართველოს ფინანსთა სამინისტროს შემოსავლების სამსახურის მებაჟე ოფიცრებმა, ეჭვის საფუძველზე, აზერბაიჯანის, სომხეთის, რუსეთისა და საქართველოს მოქალაქეების ფიზიკური და მათი მართვის ქვეშ არსებული სატრანსპორტო საშუალების დათვალიერების შედეგად, ჯამში, 26,740 ღერი არადეკლარირებული სიგარეტი, ელექტრო სიგარეტის აპარატი (IQOS – 11 ცალი), ალკოჰოლური სასმელი (5 ლიტრი) და ასევე 626 ცალი საბერძნეთისა და ლიტვის პირადობისა და მართვის მოწმობაზე ლამინირებისათვის დასაკრავი პოლიეთილენის ფირი აღმოაჩინეს.

საქართველოს საგადასახადო კოდექსის 289-ე მუხლის მე-14 ნაწილის შესაბამისად, კანონდამრღვევ მოქალაქეებს ჩამოერთვათ საქონელი, სატრანსპორტო საშუალება და სანქციის სახით ფულადი ჯარიმა, ათას-ათასი ლარი შეეფარდათ. ხოლო 2 მაისს, ბათუმის აეროპორტში, რუსეთის მოქალაქე გ.ნ-ს ფიზიკური დათვალიერებისას გამოვლენილი არადეკლარირებული საქონლის (ელექტრო სიგარეტის აპარატი (IQOS) - 5 ცალი, სიგარეტი - 7,580 ღერი) საბაჟო ღირებულებამ 4,980 ლარი შეადგინა.

საქმის მასალები, შემდგომი რეაგირების მიზნით, ფინანსთა სამინისტროს საგამოძიებო სამსახურს გადაეცა.