საროში კვირაცხოვლობას ზეიმობენ

რელიგია

05.05.2019

მართლმადიდებელი ეკლესია აღდგომის სწორზე კვირაცხოვლობის დღესასწაულს აღნიშნავს.

კვირაცხოვლობა აღდგომის დღესასწაულის განახლებაა. ამ დღიდან მოყოლებული ყოველი კვირა დღე აღდგომის დღესასწაულია. ამიტომაც მორწმუნეები კვირაობით ეკლესიაში სადღესასწაულო წირვაზე იკრიბებიან.
კვირაცხოვლობას ასევე თომას კვირა ეწოდება.

სახარებაში აღწერილია (იოანე 20, 19-20), თუ როგორ გამოეცხადა აღდგომის დღეს, საღამოს, მაცხოვარი თავის მოწაფეებს და უჩვენა თავისი ჭრილობები, როდესაც ეს შეიტყო თომამ, რომელიც ამ შეხვედრას არ ესწრებოდა, გული დასწყდა და თქვა, სანამ ჩემი თვალით არ ვიხილავ იესოს, არ დავიჯერებ მის აღდგომასო.

აღდგომიდან მერვე დღეს, ისევ კვირა საღამოს, მაცხოვარი კვლავ გამოეცხადა მოწაფეებს, ამჯერად თომას თანდასწრებით, უჩვენა ჭრილობები და უთხრა თომას, მოსულიყო და ხელით შეხებოდა. თომა მუხლებზე დაეცა, თაყვანი სცა მაცხოვარს და თქვა: “უფალო ჩემო და ღმერთო ჩემო”. იგი პირველი იყო მოწაფეთა შორის, რომელმაც სრულიად აღიარა იესო ქრისტეს ღვთაებრივი ბუნება. “შენ იხილე და ირწმუნე, თომა, – უთხრა უფალმა – ნეტარ იქნებიან ისინი, ვისაც არ უხილავს და იწამა”.

კვირაცხოვლობას ტაძრებში დაჭრილი არტოსი – საგანგებოდ გამომცხვარი პური რიგდება, რომელიც აღდგომის დღიდან მთელი ბრწყინვალე შვიდეულის მანძილზე ეკლესიებში კანკელის წინ პატარა მაგიდაზე დევს.

საროში, კვირაცხოვლობის აღნიშვნა მთავარი დღესასწაულია. ზეიმი ადგილობრივებისთვის ტრადიციად საუკუნეების წინ იქცა. ამ დღეს, ადგილობრივი მაცხოვრებლები, სოფლიდან სხვა ქალაქში საცხოვრებლად გადასული მოქალაქეები საროში იკრიბებიან და მიცვალებულთა სულებს პატივს მიაგებენ.

წინაპრების პატივისცემა სოფელში არა აღდგომიდან მეორე დღეს, არამეს კვირაცხოვლობის, იგივე თომას კვირას დღეს ხდება.

ამ დღესასწაულთან დაკავშირებით საზეიმო წირვა საროს მთავარანგელზთა სახელობის ტაძარში აღევლინება. წირვის დასრულებისთანავე რიგდება არტოსი, რომელსაც მორწმუნეები მთელი წლის განმავლობაში ინახავენ.

ბრწყინვალე შვიდეულის სადღესასწაულო დღეებში არტოსი განსაკუთრებული მადლით იმოსება და დიდ სიწმინდეს წარმოადგენს.