კორონავირუსის შემთხვევების მატების პიკს შემოდგომისთვის ველოდებით - ცერცვაძე

ჯანდაცვა

05.07.2022

თბილისის ინფექციური საავადმყოფოს დირექტორი, თენგიზ ცერცვაძე აცხადებს, რომ კორონავირუსის შემთხვევების მატების პიკს შემოდგომისთვის ელოდებიან.

თენგიზ ცერცვაძე საზოგადოებას სიფხიზლისკენ, ვაქცინაციასა და პირბადის აქტიურად გამოყენებისკენ მოუწოდებს. ცერცვაძე იმასაც აღნიშნავს, რომ მსოფლიოს 112 ქვეყანას შორის საქართველოს, გარდაცვალების პროცენტის ე.წ. CFR-ის (case fatality rate) დაბალი მაჩვენებელი აქვს. მისი თქმით, ეს საქართველოში COVID პანდემიის კარგი მართვით არის განპირობებული.

,,საქართველომ პირველმა რეგიონში და ერთ-ერთმა პირველმა მსოფლიოში შემოიტანა და პრაქტიკაში დანერგა უახლესი და სადღეისოდ ყველაზე ეფექტიანი ანტივირუსული მედიკამენტი პაქსლოვიდი. ექიმების არსენალშია და ყველა COVID ავადმყოფისთვის ხელმისაწვდომია ე.წ. სიცოცხლის გადამრჩენი მედიკამენტები: რემდესივირი, მონოკლონური ანტისხეულები (ვირუსის შესაბამისი შტამის დროს), ტოცილიზუმაბი, ბარიციტინიბი და სხვ. ჩვენ წარმატებით ვიყენებთ როგორც ბინაზე დარჩენილი, ისე ჰოსპიტალიზებული პაციენტების ე.წ. პროაქტიურ მკურნალობას, რამაც საშუალება მოგვცა მინიმუმამდე დაგვეყვანა COVID პაციენტების დამძიმების, რეანიმაციაში მოხვედრის და გარდაცვალების შემთხვევები", - აღნიშნავს თენგიზ ცერცვაძე.

მისივე თქმით, ბოლო პერიოდში საქართველოში, ისევე როგორც მთელ მსოფლიოში, ახალი შემთხვევების მნიშვნელოვანი მატება აღინიშნება.

,,წინ ზაფხულია, აქტიური ტურისტული სეზონი და COVID შემთხვევების მატების პიკს ველოდებით შემოდგომისთვის.

ამიტომ თუ გვინდა, რომ შევინარჩუნოთ დღევანდელი კარგი COVID ეპიდსიტუაცია, უნდა ვიყოთ ფხიზლად, გავაგრძელოთ აქტიური COVID ვაქცინაცია ბუსტერ დოზების ჩათვლით და მიუხედავად იმისა, რომ რეგულაციები აღარ გვავალდებულებს, ვიხმაროთ პირბადე საზოგადოებრივ ტრანსპორტში, სამედიცინო დაწესებულებებში და ხალმხრავალი შეკრების ადგილებში. მაშინაც კი, თუ COVID შემთხვევების ზრდას თავიდან ვერ ავიცილებთ, განსაკუთრებით, სასიცოცხლოდ მნიშვნელოვანია შევინარჩუნოთ სიკვდილობა დღევანდელ მინიმალურ ნიშნულზე"- აცხადებს ცერცვაძე.