შემაშფოთებელია მედიის წარმომადგენლის დაკავება მშვიდობიანი აქციის დროს - მედიაკოალიცია

მედია

12.01.2025

მედიის ადვოკატირების კოალიცია გამოცემა ბათუმელების დირექტორის, მზია ამაღლობელის უკანონო დაკავებას განცხადებით ეხმაურება და მის დაუყოვნებლივ გათავისუფლებას მოითხოვს.

ამასთან, განცხადებაში აღნიშნულია, რომ მედიის წარმომადგენლის მშვიდობიანი საპროტესტო აქციის დროს დაკავება, სადაც პოლიციამ ასევე უკანონოდ დააკავა ათამდე მოქალაქე, განსაკუთრებით შემაშფოთებელია.

,,განსაკუთრებით შემაშფოთებელია, რომ მედიის წარმომადგენლის დაკავება მოხდა მშვიდობიანი საპროტესტო აქციის დროს, სადაც პოლიციამ ასევე უკანონოდ დააკავა ათამდე მოქალაქე. აღსანიშნავია, რომ დაკავების საფუძველი - კედელზე წარწერის "იფიცება საქართველო" განთავსება - წარმოადგენს გამოხატვის თავისუფლების ლეგიტიმურ ფორმას.

კოალიცია აღნიშნავს, რომ “ქართული ოცნება” აგრძელებს მედიის წარმომადგენლებზე ზეწოლას და მათი საქმიანობის შეზღუდვას. განსაკუთრებით საგანგაშოა, რომ მაშინ, როდესაც აქციის მონაწილეთა მიმართ ძალადობის ჩამდენ პირთა მიმართ გამოძიება არ მიმდინარეობს, პოლიცია უკანონოდ აკავებს მშვიდობიან მომიტინგეებს და მედიის წარმომადგენლებს.

მედიის ადვოკატირების კოალიცია მოითხოვს დაუყოვნებლივ გათავისუფლდეს მზია ამაღლობელი, ასევე, სხვა უკანონოდ დაკავებული პირები და წინასწარ პატიმრობაში მყოფი პოლიტპატიმრები", - ვკითხულობთ მედიაკოალიციის განცხადებაში.

tv9news.ge შეშფოთებას გამოთქვამს ქვეყანაში არსებული დაძაბული ვითარების ფონზე დამოუკიდებელი მედიის მიმართ სისტემატური ხასიათის თავდასხმების, სარედაქციო დამოუკიდებლობაში ჩარევისა და დამოუკიდებელ ჟურნალისტურ საქმიანობაში ხელის შეშლის მცდელობის გამო.